डा. केसीसँग भएको सहमति संसदमा पेश गर्न माग गर्दै कांग्रेसको अवरोध
सरकार र डा. गोविन्द केसीबीच भएको सहमति सदनलाई जानकारी गराउन माग गर्दै प्रमुख विपक्षी कांग्रेसले प्रतिनिधिसभाको बैठक अवरुद्ध पारेको छ ।
बैठकको सुरुमा नै कांग्रेस सांसदहरु उठेपछि सभामुख कृष्णबहादुर महराले सांसद मिनेन्द्र रिजाललाई बोल्न समय दिए । उनले सरकार र डा. केसीबीच भएको सहमति जनताको जित भएको बताए र यसलाई संसदको सम्पत्ति बनाउन माग गरे ।
लगत्तै शिक्षामन्त्री गिरिराजमणि पोखरेलले सम्बोधन गर्दै डा. केसीसँग सहमति भएको बताए । मन्त्रिपरिषद्ले अनुमोदन गरेपछि थप जानकारी दिने उनले बताए ।
तर, कांग्रेस सांसदहरुले केके विषयमा सहमति भयो जानकारी दिन माग गरे । मन्त्री पाखेरेलले सहमतिपत्र नै संसदमा टेबल गरे तर, कुनकुन विषयमा सहमति भएको हो बताएनन् ।
कांग्रेस सांसदहरु फेरि उठे । उनीहरुले सहमति पत्र आफूहरुलाई उपलब्ध गराउन माग गरे ।
सभामुखले सहमति पत्र संसदमा टेबल भएको र केहीबेरमा उपलब्ध गराउने भन्दा पनि कांग्रेस सांसदहरु मानेनन् र संसद बैठक १० मिनेटका लागि स्थगित भएको छ ।
