विमलेन्द्र निधिले भने अबको सभापति मै हो, देउवा रामचन्द्र यसरी हुन्छन आउट
नेपाली काँग्रेसका उपसभापति विमलेन्द्र निधिले आफू आगामी सभापतिको दावेदार भएको संकेत गरेका छन् । उनले नेपाली काँग्रेसका संस्थापक विश्वेश्वरप्रसाद कोइरालाको नाम जोडेर आफू सभापतिको प्रमुख दावेदार भएको जनाउ दिएका हुन् ।
नेपाल प्रेस युनियनको केन्द्रीय समिति बैठकमा संवोधन गर्ने क्रममा उपसभापति निधिले ड्यासमै रहेका बीपी पुत्र एवं महामन्त्री डा शशांक कोइरालातिरै फर्केर भने, ‘बीपीसंग मेरो राम्रो सम्बन्ध थियो । म बीपीको यति नजिक थिएँ कि आफ्नै परिवारको जस्तो । मेरो बीपीको सम्पत्तिमा हक लाग्दैनथ्यो त्यसबाहेक निकै नजिक थिएँ ।’
निधिले त्यसरी आगामी सभापतिको लागि भाषण दिइरहँदा महामन्त्री कोइरालाले उनलाई गहिरिएर नियालिरहेका थिए । यसको जवाफ भने कोइरालाले दिन पाएनन् । किनकि कोइरालाले पहिले नै आफ्ना भनाइ राखिसकेका थिए ।
सभापतिको दावेदारी अहिलेदेखि ? को को हुन् त ?
२०७२ साल फागुनमा नेपाली काँग्रेसको नेतृत्वका लागि निर्वाचन भएको थियो । शेरबहादुर देउवाले वरिष्ठ नेता रामचन्द्र पौडेललाई अन्तिम भिडन्तमा पराजित गरेका थिए । त्रिपक्षीय भिडन्तमा पूर्वमहामन्त्री कृष्णप्रसाद सिटौला तेस्रो भएपछि उनले देउवालाई समर्थन गरेका थिए ।
विधान अनुसार देउवाको कार्यकाल चार वर्षको हो । अझै कम्तीमा डेढ वर्ष देउवा नै सभापति हुनेछन् । त्यसपछि उनले कुर्सी छाड्ने छन् । समय हेरेर ६ महिना लम्ब्याउन पाउने छन् । त्यसपछि ईच्छा भयो भने पुनः उम्मेदवार बन्नेछन् ।
अहिलेको परिस्थिति हेर्दा देउवाले फेरि सभापति हत्याउन खोज्ने छैनन् । वरिष्ठ नेता रामचन्द्र पौडेल सदावहार दावेदार हुन् । सिटौलाले पनि सोही किसिमको लबिङ थालिसकेका छन् ।
उपसभापतिको हैसियतले निधि पनि त्यसका दावेदार हुन् । लामो समय बाँकी रहे पनि निधिले प्रसंग पारेर आफ्नो कुरो राखिसकेका छन् ।
त्यसैगरी महामन्त्री पनि सभापतिको दावेदार हुने भएकाले डा कोइराला पनि दावेदार हुन् । त्यसबाहेक दृष्यमा देखिने सभापतिका दावेदारमा प्रकाशमान सिंह, डा शेखर कोइराला, पूर्णबहादुर खड्का, डा रामशरण महत, सुजाता कोइराला, अर्जुन नरसिंह केसी आदिआदि…….।
