केसीले आजै जुस खाएर अनशन तोड्ने, यस्तो हुने भो सहमति, काँग्रेसको आन्दोलनले पनि हावा खाने भो

 

अनशनरत डा. गोविन्द केसीका मागमा सरकार र केसी पक्ष सहमतिनजिक पुगेका छन् । मंगलबार प्रधानमन्त्री तहदेखि सक्रिय रूपमा भएको भेटघाट र वार्तापछि राति दुई वार्ताटोली केसीका धेरै मागमा सहमतिनजिक पुगेका हुन् । सिंहदरबारमा सरकारी र केसी पक्ष वार्ताटोलीबीच भएको वार्ता मिलनबिन्दुनजिक पुगेको दुवै पक्षले विज्ञप्तिमार्फत जानकारी गराएका छन् ।

 

सरकारी वार्ताटोलीका सदस्य डा. गुणराज लोहनीले केसीले उठाएका सबै मागमा सहमतिनजिक पुगिएको बताए । केसी पक्ष वार्ताटोली संयोजक डा. अभिषेक सिंहले पनि बुधबार वार्ताले सकारात्मक नतिजा दिने विश्वास मंगलबारको वार्ताले दिलाएको जानकारी दिए । तर, चिकित्सा शिक्षा विधेयकको विषयमा भने वार्ताटोलीले समझदारी खोज्न सकेन ।

 

बिहानदेखि रातिसम्म के–के भयो ?
डा. केसीका माग सम्बोधन गर्न मंगलबार दिनभर राजनीतिक तहदेखि नै छलफल भए । बिहानै प्रधानमन्त्री केपी ओलीले वार्ताको वातावरण बनाउने प्रक्रिया सुरु गरे । यसैअनुसार मध्याह्नतिर प्रधानमन्त्री केपी ओली र नेकपा अध्यक्ष प्रचण्डको बोलावटमा माथेमा कार्यदलका संयोजक केदारभक्त माथेमालगायत बालुवाटार पुगे । वार्तामा संयोजनकारी भूमिका पूर्वसभामुख सुवास नेम्वाङले खेलेका थिए । ओली र प्रचण्डले केसीका मागमा सम्बोधन गर्न सक्ने ‘बटमलाइन’ बताएपछि माथेमाले केसी पक्षलाई जानकारी गराए ।

 

अपराह्नतिर नेम्वाङले केसी पक्ष वार्ताटोलीसँग सिंहदरबारमा छलफल गरे । डा. केसीका मागमा सरकारको धारणा सुनाए । त्यसपछि केसी पक्ष सरकारी वार्ताटोलीसँग वार्तामा बस्न तयार भयो ।

 

नेम्वाङसँगको भेटपछि सरकारी धारणा सुनाउन टोली डा. केसीकहाँ पुगे । नेम्वाङले भने सरकारी वार्ताटोलीलाई फोन गरेर केसी पक्षलाई वार्तामा आउन आग्रह गर्न भने । लगत्तै सरकारी वार्ताटोलीले केसी पक्षलाई वार्तामा आउन आग्रह गर्‍यो ।

 

साँझ ६ बजे दुवै वार्ताटोली शिक्षा मन्त्रालयमा भेला भए । राति अबेरसम्म बसेको दुई पक्षका वार्ताटोली विधेयकका विषयबाहेक केसीका सबै मागमा सहमतिनजिक पुगेका छन् । सरकारसँग केसीले सात माग राखेका छन् ।

 

कस्तो छ केसीको स्वास्थ्य ?
२६ दिनदेखि अनशनरत डा. केसीको स्वास्थ्य जटिल बन्दै गएको छ । केसीका सहयोगीहरूले स्वास्थ्य परीक्षण गरिरहेका छन् । केसीको शरीरमा रगतका सम्पूर्ण ‘प्यारामिटर’हरू असामान्य बन्दै गएको छ । मंगलबार सेतो रक्तकोषिकाको संख्या अहिलेसम्मकै न्यून अवस्थामा पुगेको छ । यति कम सेतो रक्तकोषिका भएका बिरामीलाई संक्रमण हुने सम्भावना बढी हुन्छ । रगतमा ग्लुकोजको मात्रा पनि न्यून देखिएको छ । पोटासियम, म्याग्नेसियम र क्याल्सियमको मात्रा कम छ । पोटासियम एकदमै न्यून भएकाले मुटुमा समस्या ल्याउने खतरा बढी छ ।

 

केसीले सम्भवतः आजै अनशन तोड्नुहुन्छ
डा. गुणराज लोहनी
सदस्य, सरकारी वार्ताटोली
वार्ता सकारात्मक भएको छ । चिकित्सा शिक्षा विधेयकबाहेक केसीले उठाएका सबै मागमा सहमति भएको छ । सम्भवतः डा. केसीले बुधबार (आज) अनशन तोड्नुहुनेछ । सरकार जसरी पनि केसीका माग पूरा गरेर अनशन तोडाउने पक्षमा लागेको छ । विधेयकका विषयमा सरकारी वार्ताटोलीले मात्रै निर्णय लिन नसक्ने भएकाले सहमति जुट्न नसकेको हो । माथिल्लो निकायमै छलफल गर्नुपर्ने भयो । मन्त्रालयस्तरबाट सम्बोधन हुने मागमा सहमति भएको छ ।

 

विधेयकका विषयमा केही असमझदारी छन्
डा. अभिषेक सिंह
संयोजक, केसी पक्ष वार्ताटोली
विधेयकको विषयमा केही असमझादारी छन्, बाँकी विषयमा करिब–करिब समझदारी भएको छ । सम्भवतः बुधबार वार्ताले सकारात्मक नतिजा देला । हामीले यो विश्वास लिएका छौँ ।