यी हुन् फिफा वर्ष खेलाडीको उत्कृष्ट १० को सूचीमा पर्नेहरु
फुटबलको सर्वोच्च निकाय फिफाले फिफा वर्ष खेलाडीका लागि विश्वका उत्कृष्ट १० खेलाडीको सूची सार्वजनिक गरेको छ । सूचीमा विश्वकपमा तहल्का मच्याउनेदेखि विश्वकपमा आउँदासम्म तहल्का मच्याएका खेलाडीहरु समावेश छन् । फेरि पनि अन्तिम १० को सूचीमा १० नम्बरको जर्सीको बाहुल्यता रहेको छ ।
फिफाले सार्वजनिक गरेको मनोनयनको सूचीमा विश्वकप च्याम्पियन फ्रान्सबाट तीन खेलाडी परेका छन् । ब्राजिलियन फुटबल लिजेन्ड पेलेको कीर्तिमान बराबरी गरेका फ्रान्सका किलियम एम्बाप्पेसँगै एन्टोनियो ग्रेजम्यान र राफेल भाराने उत्कृष्ट १० को सूचीमा परेका हुन् ।
मनोनयनमा परेका अरु खेलाडीमा अर्जेन्टिनाका स्टार खेलाडी लियोनल मेस्सी र पोर्चुगलका क्रिस्टियानो रोनाल्डो पनि छन् ।
मेस्सी र रोनाल्डोले ५–५ पटक बलुन डे ओर जितिसकेका छन् । यसैगरी इंग्लण्डका ह्यारी केन र इजिप्टका मोहमद सलाह पनि फिफा बर्ष उत्कृष्ट खेलाडीको मनोनयमा परेका छन् ।
यसैगरी चेल्सी तथा बेल्जियमका एडिन हाजार्ड, म्यान्चेस्टर सिटी तथा बेल्जीयमका केभिन डे ब्रायन र रियाल मड्रिड तथा क्रोएसियाका लुका मोड्रिच पनि मनोनयनमा परेका छन् ।
फिफाले सेप्टेम्बर २४ तारिखमा लण्डनमा वर्ष खेलाडी घोषणा गर्नेछ । पहिलो पटक पाँच पाँच पटक उपाधि जितेका मेस्सी र रोनाल्डो यसपटक चुक्ने सम्भावना औंल्याइए पनि विश्वकपलाई मात्र आधार बनाएर उपाधि दिइनु हुन्न भन्ने बहस पनि सुरु भएको छ ।
