ग्रिसमा भीषण आगलागी, २० जनाको मृत्य, १०४ जना भन्दा धेरै घाइते
ग्रिसको जंगलमा भएको आगलागीका कारण अहिलेसम्म कम्तिमा २० जनाको ज्यान गएको सरकारी अधिकारीले बताएका छन् । ग्रिसले आगलागी नियन्त्रण गर्न अन्तर्राष्ट्रिय सहयोगका लागि अपिल गरेको छ ।
राजधानी एथेन्स नजिक रहेका जंगलसहितका क्षेत्रमा भीषण आगलागी भएको छ । आगो नियन्त्रणमा लिने प्रयासमा सयौँ अग्निनियन्त्रक खटिएका छन् । मानिसले आफ्नो घर छोडेर सुरक्षित स्थानमा लागेका छन् ।
आगलागी भएको क्षेत्रमै हराएका १० जना पर्यटकको खोजी तथा उद्धार अभियान पनि जारी छ । ग्रिसका प्रधानमन्त्री एलेक्सिस सिप्रासले आगो नियन्त्रणका लागि मानवीय रुपमा सम्भव भएका सबै प्रयास आफूहरुले गरिरहेको बताएका छन् । उनले आगलागीले भीषण रुप लिएपछि बोसनियाको निर्धारित औपचारिक भ्रमण रद्द गरेको छन् ।
आगो नियन्त्रणमा लिन निकै गठीन रहेको अग्निनियन्त्रकले बताएका छन् । मंगलबार बिहानै सरकारका प्रवक्ता डिमिट्रिस जानाकोपोउलोसले ज्यान गुमाउनेको संख्या २० नाघेको पुष्टि गरेका हुन्।
ज्यान गुमाउनेमा राजधानी एथेन्सबाट ४० किलोमिटर उत्तर–पूर्वमा समुद्र किनारमा रहेको मातीको रिसोर्टमा फसेकाहरु रहेका छन् । उनीहरु कि कार कि घरमै मरेका हुन् । आगलागीका कारण १०४ जना भन्दा धेरै घाइते भएका छन् । ११ जनाको अवस्था गम्भीर रहेको छ ।
