फ्रान्स भर्सेस क्रोएसिया : २० वर्षअघि सेमिफाइनलमा, अहिले फाइनलमा
विश्वकप फुटबलको फाइनल खेल आइतबार राति पौने ९ बजे मस्कोमा हुँदैछ । विश्व विजेता बन्नका लागि २० वर्षअघिको विजेता फ्रान्स र पहिलो पटक फाइनल खेल्न लागेको क्रोएसिया प्रतिस्पर्धामा छन् ।
यो फाइनल खेल २० वर्षअघि अर्थात सन् १९९८ को विश्वकपमा भएको सेमिफाइनलको पुनराबृत्तिको रुपमा रहेको छ ।
२० वर्षअघिको त्यो सेमिफाइनलमा फ्रान्स र क्रोएसियाले प्रतिस्पर्धा गरेको थिए, यी दुई टोलीबिच अहिलेसम्म विश्व स्तरमा भएको यो नै एक मात्र खेल हो । त्यो खेलमा फ्रान्सले क्रोएसियालाई २–१ ले पाखा लगाएको थियो ।
अहिले आएर दुई टोली विश्व स्तरको दोस्रो भेटमा फाइनलमा आमने सामने हुँदैछन् । त्यो बेला आयोजक रहेको फ्रान्ससँग पराजित भएको क्रोएसियाका लागि अहिले त्यसको बदला लिँदै इतिहास लेखाउने मौका छन् ।
धेरै अर्थमा त्यो सेमिफाइनल र अहिले हुन लागेको फाइनल खेल समानान्तर छन् । क्रोएसियाले स्वतन्त्र राष्ट्रका रुपमा पहिलो पटक सेमिफाइनल यात्रा तय गरेर फाइनलमा स्थान बनाएको छ ।
युवा खेलाडीको उत्कृष्ट लयले फ्रान्स फेरि विश्व विजेता बन्ने होडमा छ । क्रोएसियाले उत्कृष्ट प्रदर्शन गरेको छ । फ्रान्सका लागि त्यो सेमिफाइनल र यसपटक बेल्जियमसँगको सेमिफाइनल दुवै उत्कृष्ट सफलता हुन् ।
सन् १९९८ को विश्वकपमा क्रोएसियाले क्वाटरफाइनलमा जर्मनीलाई ३–० ले हराएको थियो । यो विश्वकपमा उसले समूह चरणमा अर्जेन्टिनामाथि ३–० कै जित निकाल्यो ।
फ्रान्सका लागि पनि २० वर्षअघि र अहिलेको विश्वकप केही हदसम्म समान छ । त्यो विश्वकपमा फ्रान्सले सेमिफाइनलमा क्रोएसियासँगको खेल अघि एक गोल मात्रै खाएको थियो । अहिले भने उसले गोल त खाएको छ तर त्यसलाई जित्ने गोल आफूले पनि गरेको छ ।
त्यो बेला जिनेदिन जिदान तथा थिएरी हेनरी जस्ता स्टार खेलाडी थिए भने अहिले पनि स्टार खेलाडीको कमी छैन । त्यो विश्वकप र यो विश्वकपमा सीधा सम्बन्ध पनि छ । उ बेला खेलाडी रहेका डिडिएर डेसच्याम्पस अहिले फ्रान्सका प्रशिक्षक छन् ।
आइतबार रातिको खेलको नतिजा २० वर्षअघिको जस्तै २–१ को हुन सक्ने सम्भावना छ तर कसको पक्षमा त्यो भने भन्न सकिँदैन । यो विश्वकपमा अहिलेसम्म भएका मध्ये १५ खेलमा १–० को नतिजा आएको छ भने १४ खेलमा २–१ को नतिजा निक्लिएको छ ।
