सेमिफाइनलमा पुगेका चार टिम र खेलाडी बारे जान्नै पर्ने केही तथ्य, यस्ता छन कारण
रुसमा जारी विश्वकप फुटबल अन्तर्गत मंगलबार देखि सेमिफाइनलका खेल हुँदैछन् । यसको अर्थ अब विश्व विजेताको आँकलन गर्न थप सजिलो बन्दैछ । सम्भावित विजेताको सूचि साँघुरो हुँदैछ ।
अन्तिम दुईमा अर्थात फाइनलमा स्थान बनाउनका लागि मंगलबार फ्रान्सले बेल्जियम तथा बुधबार इंग्ल्याण्डले क्रोएसियासँग प्रतिस्पर्धा गर्नेछ । यसपटक अन्तिम चारमा पुगेका सबै टिम युरोपेली हुन् ।
विश्वकपको अन्तिम चारमा पुगेका चार टिम र उनीहरुसँग जोडिएका केही तथ्य यस्ता छन् ।
विश्वकपको इतिहासमा पाँचौँ पटक विश्वकपको सेमिफाइनलमा पुगेका सबै टिम युरोपेली छन् । यसअघि सन् १९३४, १९६६, १९८२ र २००६ मा पनि सेमिफाइनलमा पुगेका सबै टिम युरोपेली थिए । र यो पटकजस्तै ती सबै प्रतियोगिता युरोपकै भूमिमा भएका थिए ।
अन्तिम चारमा पुगेका चारै टिम विश्वकपको इतिहासमा दाबेदारका रुपमा हेरिने गरेका टिम खासै होइनन् । पछिल्लो पटक बेल्जियम सन् १९८६, इंग्ल्याण्ड सन् १९९०, क्रोएसिया सन् १९९८ र फ्रान्स सन् २००६ को विश्वकपमा अन्तिम चारमा पुगेका थिए ।
मंगलबार राति पौने १२ बजे हुने खेल फ्रान्स र बेल्जियमबिचको सम्रगमा ७४ औँ भेट हो । यसअघि भएका खेलमा बेल्जियम ३० तथा फ्रान्स २४ खेलमा विजयी भएको छ । १९ खेलमा बराबरी भएको छ । तर विश्वकपमा भने फ्रान्सको पक्ष बलियो छ । सन् १९३८ र १९८६ मा भएका भेटमा फ्रान्स नै विजयी भएको छ ।
बेल्जियमका रोबर्टो मार्टिनेज विश्वकप इतिहासमा दोस्रो प्रशिक्षक हुन्, जसले त्यो देशको नागरिक नभएर पनि विश्वकपमा टिमलाई सेमिफाइनलमा पुर्याएका छन् । मार्टिनेज स्पेनका नागरिक हुन् । यसअघि ब्राजिलका लुइज फिलिपे स्कोलारीले सन् २००६ मा पोर्चुगललाई विश्वकपको सेमिफाइनलमा लगेका थिए ।
बेल्जियम रुस विश्वकपमा अहिलेसम्म आफूले खेलेका सबै खेल जित्ने एक मात्र टिम हो । उसले समूह चरणका तीन तथा अन्तिम १६ र क्वाटर फाइनलको खेल जितेको छ । यस्तै उ सबैभन्दा धेरै गोल गर्ने टिम पनि हो, पाँच खेलमा बेल्जियमले १४ गोल गरेको छ ।
क्रोएसिया विश्वकपको इतिहासमा दोस्रो त्यस्तो टिम हो, जसले एउटै विश्वकपमा दुई पटक पेनाल्टी सुटआउटमा जितेको छ । यसअघि सन् १९९० मा अर्जेन्टिनाले यस्तै गरेको थियो ।
क्रोएसियाले अन्तिम १६ मा डेनमार्कलाई टाइब्रेकरमा ३–२ तथा क्वाटरफाइनलमा रुसलाई टाइब्रेकरमै ४–३ ले हराएको थियो ।
यस्तै इंग्ल्याण्डले अन्तिम १६ मा कोलम्बियालाई टाइब्रेकरमा हराएको थियो । इंग्ल्याण्ड यसअघि विश्वकपमा तीन पटक पेनाल्टी सुटआउटमा पराजित भएको थियो ।
इंग्ल्याण्डले तेस्रो पटक विश्वकपको सेमिफाइनल खेल्दैछ र सबै युरोपमा नै हो । घरेलु मैदानमा भाएको सन् १९६६ को विश्वकपमा त उ विजेता नै बनेको थियो । यस्तै इटालीमा भएको सन् १९९० को विश्वकपमा पनि इंग्ल्याण्ड सेमिफाइनलमा पुगेको थियो ।
सेमिफाइनलमा रहेको क्रोएसियाले विश्वकपका पाँच खेलमा हार बेहोरेको छैन भने उसले लगातार नौ खेलमा गोल गरेको छ ।
इंग्ल्याण्डका ह्यारी केन यो प्रतियोगिताका सर्वाधिक गोलकर्ता हुन्, उनले ६ गोल गरेका छन् । यस्तै बेल्जियमका रामेलु लुकाकुले चार गोल गरेका छन् ।
फ्रान्सका एन्टोनी ग्रिजम्यान र केलियन एमबाप्पेले ले तीन तीन गोल गरेका छन् भने क्रोएसियाका लुका मोड्रिकले दुई गोल गरेका छन् ।
