विश्वकप २०१८ फ्रान्स भर्सेस बेल्जियम, इतिहास बनाउने र दोर्याउने यात्रा, फ्रान्सले जित्ने पक्का, यस्तो छ कारण
रुसमा जारी विश्वकप फुटबलमा मंगलबारदेखि सेमिफाइनलका खेल सुरु हुँदै छन् । उपाधि यात्रामा रहेका चार मध्ये दुई टिमले मंगलबार अघि बढ्ने प्रयासमा प्रतिस्पर्धा गर्नेछन् ।
पहिलो सेमिफाइनलमा मंगलबार राति पौने १२ बजे फ्रान्स र बेल्जियमबिच प्रतिस्पर्धा हुँदैछ । सेन्ट पिटर्सबर्गमा हुने खेलमा दुवै टिम फाइनलमा यात्रा तय गर्नका लागि कडा प्रतिस्पर्धामा हुने छन् ।
क्वाटरफाइनलमा फ्रान्सले दक्षिण अमेरिकी देश उरुग्वेलाई २–० ले पाखा लगाउँदै सेमिफाइनल यात्रा तय गरेको हो ।
यस्तै बेल्जियमले विश्वकपको सबैभन्दा सफल टिम पाँच पटकको विजेता ब्राजिलको सपना चकनाचुर पारेका हो । क्वाटरफाइनलमा बेल्जियमले नेइमारको टिम ब्राजिललाई २–१ ले हराएको हो ।
दुई दक्षिण अमेरिकी देशलाई हराएका युरोपेली देशबिच सेमिफाइनलमा प्रतिस्पर्धा हुन लागेको हो ।
फ्रान्स एन्टोनी ग्रिजम्यान, केलियन एमबाप्पेसहितका स्टार युवा खेलाडीले भरिएको छ भने बेल्जियमको टिममा पनि स्टार खेलाडीको कमी छैन । बेल्जियमको टिममा रामेलु लुकाकु, केभिन डी ब्राउन, इडन हजार्डसहितका युवा स्टार खेलाडी छन् ।
फ्रान्सेली टिमका बलिया खेलाडी हुन्, ओलिभर जिरउड । तर उनले अहिलेसम्म यो विश्वकपमा गोल गर्न सकेका छैनन् । र पनि उनी बेल्जियमसँगको खेलमा मैदानमा हुनेछन् । गोल भन्दा पनि उनको उपस्थिति टिमका लागि महत्वपूर्ण हुने देखिएको छ ।
बेल्जियमका प्रशिक्षक रोबर्टो मार्टिनेजले आफ्नो नियमित फर्म्याट ३–४–२–१ लाई छोडेर ब्राजिलसँगको खेलमा ४–३–३ को रणनीति अपनाए । उनको यो रणनीति ब्राजिललाई घर फर्काउन सफल भयो ।
अब उनले फ्रान्ससँगको खेलमा पनि यही रणनीति अपनाउँछन् कि आफ्नो पुरानो रणनीतिमा फर्किने छन् भन्ने खुलेको छैन ।
हेड–टू–हेड
फ्रान्स र बेल्जियमबिच मुख्य प्रतिस्पर्धामा यसअघि तीन पटक भेट भएको छ । त्यसमा फ्रान्सको पक्ष बलियो छ, तीनै खेलमा उसले जित निकालेको छ । यी दुई टोलीबिच विश्वकपमा यसअघि दुई पटक भेट भएको छ ।
फ्रान्सले सन् १९३८ को विश्वकपको पहिलो चरणमा बेल्जियमलाई ३–१ ले हराएको थियो । यस्तै सन् १९८६ को विश्वकपमा तेस्रो स्थानका लागि भएको प्ले–अफमा फ्रान्सले अतिरिक्त समयमा बेल्जियमलाई ४–२ ले निराश पारेको थियो ।
यस्तै फ्रान्सले सन् १९८४ मा भएको युरोपियन च्याम्पियनसिपको समूह चरणमा बेल्जियमलाई ५–० ले हराएको थियो । त्यो नान्टेसमा भएको त्यो खेलमा मिसेल प्लेटिनीले ह्याट्रिक गरेका थिए ।
फ्रान्ससँग भएका पछिल्ला तीन मैत्रीपूर्ण खेलमा भने बेल्जियम अपराजित छ । एक खेलमा विजयी भएको छ भने दुई खेलमा बराबरी भएको छ । पछिल्लो पटक सन् २०१५ को जुनमा भएको खेलमा बेल्जियम ४–३ ले विजयी भएको थियो ।
मुख्य प्रतिस्पर्धा, अरु प्रतिस्पर्धा तथा मैत्रीपूर्ण खेल गरी फ्रान्स र बेल्जियमबिच अहिलेसम्म ७३ पटक भेट भएको छ । त्यसमा बेल्जियम ३० तथा फ्रान्स २४ खेलमा विजयी भएको छ । १९ खेल भने बराबरीमा टुंगिएका छन् ।
फ्रान्सले विश्वकपमा सेमिफाइनल यात्रा तय गरेको यो छैटौँ पटक हो । सुरुका तीन (१९५८, १९८२ र १९८६) विश्वकपमा, जसमा फ्रान्स सेमिफाइनलमा पुगेको थियो, त्यसमा उ पराजित भएको थियो ।
तर त्यसपछिका दुई प्रतिस्पर्धामा भने उसले जित निकाल्यो । उसले सन् १९९८ मा त विश्वकपको उपाधि नै जित्यो भने सन् २००६ मा फाइनल खेल्यो ।
पेनाल्टी सुटआउट बाहेक विश्वकप नकआउट चरणमा फ्रान्सको पछिल्लो अवस्था बलियो छ ।
नकआउट चरणका पछिल्ला १३ खेलमा निर्धारित वा अतिरिक्त समयमा अर्थात पेनाल्टी सुटआउट बाहेक फ्रान्स एक पटक मात्रै पराजित भएको छ । फ्रान्स सन् २०१४ को विश्वकपको क्वाटरफाइनलमा जर्मनीसँग १–० ले पराजित भएको थियो ।
बेल्जियम
मार्टिनेजको टिम बेल्जियमले विश्वकपमा सेमिफाइनल खेल्न लागेको यो दोस्रो पटक हो ।
यसअघि सन् १९८६ को विश्वकपमा बेल्जियमले सेमिफाइनलसम्मको यात्रा तय गरेको थियो । त्यो बेला अर्जेन्टिनाले उसलाई २–० ले हरायो । दुवै गोल डिएगो म्याराडोनाले गरेका थिए ।
यस्तै युरोपियन च्याम्पियनसिपमा पनि बेल्जियम एक पटक मात्रै सेमिफाइनलमा पराजित भएको छ । सन् १९७२ को युरोपियन च्याम्पियनसिपको सेमिफाइनलमा बेल्जियम पश्चिम जर्मनीसँग २–१ ले पराजित भएको थियो ।
बेल्जियम सन् १९८० को युरोपियन च्याम्पियनसिपको फाइनलमा पुगेको थियो । त्यो बेला पनि उ पश्चिम जर्मनीसँग पराजित भयो । त्यो प्रतियोगितामा बेल्जियमले सेमिफाइनल खेल्नु परेको थिएन, उसले समूह चरणमा विजेता बनेर सीधै फाइनलमा स्थान बनाएको थियो ।
बेल्जियमको पछिल्लो नतिजा हेर्दा निकै राम्रो छ । उ पछिल्ला २४ खेलमा अपराजित छ, जसमा १९ खेलमा जित निकालेको छ भने पाँच खेलमा बराबरी भएको छ ।
यो विश्वकपमा बेल्जियम सबैभन्दा धेरै गोल गर्ने टिम हो, उसले अहिलेसम्म खेलेका पाँच खेलमा १४ गोल गरेको छ ।
आत्मघाती गोल बाहेक रुस विश्वकपमा बेल्जियमका ९ खेलाडीले गोल गरेका छन् ।
यो विश्वकपमा चार गोल गरिसकेका रामेलु लुकाकुले बेल्जियमका पछिल्ला १३ खेलमा २० गोलमा आफ्नो भूमिका खेलेका छन् । उनले १७ गोल गरेका छन् भने तीन गोलका लागि सहयोग गरेका छन्।देश सञ्चारबाट
