विश्वकप २०१८, को को पुगे सेमिफाइनलमा, यस्तो छ खेल तालीका, भव्य सपनामा बाँकी रहेका चार देश
सपना भव्य हो, त्यसैले त अभियान पनि भव्य छ । चासो भव्य छ अनि प्रशंसा, आलोचना, उत्साह, निराशा सबै भव्य छन्–विश्वकप फुटबल ।
रुसमा जारी विश्वकप फुटबलमा तीन हप्ताअघि गोल्डेन ट्रफीको सपना बुनेर यात्रा सुरु गरेको ३२ देश मध्ये अब सीमित देश मात्रै बाँकी रहेका छन् । अर्थात अब विश्वकपको सपना यो पटकका लागि मात्रै चार टिमको बाँकी हरेको छ ।
शनिबार राति भएका क्वाटरफाइनलका खेलपछि सेमिफाइनल समिकरण पूरा भएको छ । यसपटकको विश्वकपको उपाधि उचाल्ने सपना अझै बाँकी राख्न सफल चार टिम हुन्, बेल्जियम, फ्रान्स, इंग्ल्याण्ड र क्रोएसिया ।
यसपटक कुनै पनि दक्षिण अमेरिकी देश अन्तिम चारमा आएका छैनन् । सेमिफाइनलमा स्थान बनाएका चारै देश युरोपका हुन् । यसको अर्थ यसपटकको विश्वकप युरोपमा जाने पक्का छ ।
सपनाको यात्रामा बाँकी रहेका मध्ये अझै तीन देशलाई पाखा लगाउँदै एकदेश विश्व विजेता बन्नेछ ।
क्वाटरफाइनलका खेलमा फ्रान्सले दक्षिण अमेरिकी देश उरुग्वेलाई २–० ले हराएर अन्तिम चारमा स्थान पक्का गर्यो ।
त्यहि रात ब्राजिलको सपना पनि अर्को युरोपेली देशबाट टुट्यो । बेल्जियमले विश्वकपमा सबैभन्दा सफल टिम ब्राजिललाई २–१ ले हराउँदै विश्वकपको अन्तिम चारमा स्थान पक्का गरेको हो ।
यस्तै शनिबार भएका खेलमा स्वीडेनको चुनौती २–० ले पन्छाउँदै ह्यारी केनको कप्तानीमा रहेको इंग्ल्याण्डले सेमिफाइनल यात्रा तय गरेको छ ।
यसैगरी रोमाञ्चक रुपमा क्वाटरफाइनलसम्मको यात्रा तय गरेको आयोजक रुसको यात्रा टुंग्यायो क्रोएसियाले । २–२ को बराबरी भएपछि खेलको निर्णय टाइब्रेकरबाट लिइयो । त्यसमा क्रोएसिया ४–३ ले विजयी भयो र सेमिफाइनलमा स्थान पक्का गर्न सफल भयो ।
अब आउँदो मंगलबारदेखि सेमिफाइनलका खेल हुनेछन् । चार देशले फाइनलमा स्थान बनाउनका लागि प्रतिस्पर्धा गर्नेछन् ।
फ्रान्स भर्सेस बेल्जियम (जुलाई १० अर्थात असार २६ गते, राति पौने ११ बजे)
क्रोएसिया भर्सेस इंग्ल्याण्ड (जुलाई ११ अर्थात असार २७ गते, राति पौने ११ बजे)
