मेस्सीलाई रोक्न तीन डिफेण्डर उम्टिटी, राफेल भेरानो र लुकासलाई जिम्मा
यदि क्यामेराको अगाडि देखिने प्रशिक्षकको भावभंगीले टिमको मनोदशालाई संकेत गर्छ भने फ्रान्स निकै दबावमा छ ।
विश्वकपको नकआउट चरणमा अर्जेन्टिनासँग खेल्नुअघि झण्डै २० मिनेट क्यामेराका सामू आएका फ्रान्सेली प्रशिक्षक डिडिएर डेसच्याम्पमा उत्साह थिएन । यो खेल नेपाली समयअनुसार ७ः४५ बजे हुनेछ ।
‘मेस्सी भनेको मेस्सी नै हुन्’ डेसच्याम्प भन्छन्, ‘हामी उनलाई मार्क गर्दै प्रभावहीन बनाउन खोज्छौं । तर, हामीलाई थाहा छ कि यसले पनि निकै कम प्रभाव पार्छ ।’
फ्रान्सले मेस्सीलाई रोक्ने जिम्मेवारी ला लिगाका तीन डिफेण्डर-उम्टिटी, राफेल भेरानो र लुकास हर्नान्डेजलाई दिनेछ । उनीहरु मेस्सीको खेल शैलीसँग परिचित छन् ।
प्रशिक्षक डेसच्याम्पले भने, ‘यो हाम्रो लागि फाइदा हो भन्न सक्दिनँ तर, घाटा पनि होइन । यदि तपाईंले उनीविरुद्ध पहिले खेल्नु भएको छ भने उनले सिर्जना गर्ने खतराका बारेमा पहिल्यै सचेत रहन सक्नुहुन्छ ।’
उनले अगाडि भने, ‘म कुनै बहानाबाजी गरिरहेको त छैन, तर तपाईं देख्न सक्नुहुन्छ हाम्रा १४ जना खेलाडीसँग विश्वकपको अनुभव छैन ।
पाँच जनाले पहिलोपटक अष्ट्रेलियाविरुद्ध खेले र अन्य पाँच जनाले डेनमार्कविरुद्ध । यद्यपि अनुभवको कमी भए पनि प्रतिभाको कमी हामीसँग छैन ।’
समूह चरणका म्याचहरुमा फ्रान्सका अग्रपङ्तिका खेलाडीहरु निस्तेज देखिए । एन्टोनी ग्रिजम्यान अनिश्चयमा देखिन्थे । डिस्च्याम्प आफैं उनलाई ९ नम्बरमा खेलाउने कि १० नम्बरमा भनेर द्विविधामा थिए ।
‘हो, सुरुमा अलिकति कठिन भयो । तर, उनले डेनमार्कविरुद्ध ६५ मिनेट खेले, जसमा केही सकारात्मक संकेत देखिएको छ । हामी उनलाई उच्च र्फममा देख्न चाहन्छौं,’ डिस्च्याम्पले ग्रिजम्यानप्रति आशा व्यक्त गरे ।
