यो बल प्रयोग हुँदैछ विश्वकपमा आजदेखि, यस्तो छ कारण
रुसमा जारी विश्वकप फुटबलको नकआउट चरण शनिबारदेखि सुरु हुँदैछ । अबका खेलहरुमा नयाँ बल प्रयोग हुनेछ । समूह चरणमा प्रयोग भएको भन्दा भिन्दै बल प्रयोग हुने विश्व फुटबलको प्रशासकीय निकाय फिफाले यसअघि नै जानकारी दिइसकेको छ ।
समूह चरणका खेलमा कालो र सेतो रहेको एडिडासको टेलस्टार १८ बल प्रयोग भएको थियो । यस्तो खालको क्लासिक बल ४८ वर्षपछि यो विश्वकपमा प्रयोग भइरहेको हो ।
अब नकआउट चरणका खेलमा टेलस्टार मिस्टा बल प्रयोग हुनेछ । एडिडासले यो बल तयार पारेको हो । नकआउट चरणमा प्रयोग हुने बलमा सेतोमा रातो र केही कालो रंगको डिजाइन गरिएको छ ।
यो रंग रुसको आधिकारिक रंगबाट प्रभावित भएको जनाइएको छ । यस्तै बलको रंगले नकआउट चरणमा बढ्दै गएको खेलको गर्मीलाई पनि संकेत गर्नेछ ।
रुसी भाषामा मिस्टाको अर्थ सपना हुन्छ । यो नयाँ बल शनिबार बेलुका पौने ८ बजे हुने फ्रान्स र अर्जेन्टिनाबिचको खेलमा पहिलो पटक प्रयोग हुनेछ ।
