विश्वकप नकआउट चरणका लागि नयाँ बल तयार, बलमा के के संकेत छन् ?
रुसमा जारी विश्वकप फुटबलको नकआउट चरणमा नयाँ बल प्रयोग हुने भएको छ । समूह चरणमा प्रयोग भएको भन्दा भिन्दै बल प्रयोग हुने विश्व फुटबलको प्रशासकीय निकाय फिफाले जनाएको छ ।
अहिले समूह चरणका खेलमा कालो र सेतो रहेको एडिडासको टेलस्टार १८ बल प्रयोग भइरहेको छ । यस्तो खालको क्लासिक बल ४८ वर्षपछि यो विश्वकपमा प्रयोग भइरहेको हो ।
अब नकआउट चरणका खेलमा टेलस्टार मिस्टा बल प्रयोग हुनेछ । एडिडासले यो बल तयार पारिसकेको छ । नकआउट चरणमा प्रयोग हुने बलमा सेतोमा रातो र केही कालो रंगको डिजाइन गरिएको छ ।
यो रंग रुसको आधिकारिक रंगबाट प्रभावित भएको जनाइएको छ ।
यस्तै बलको रंगले नकआउट चरणमा बढ्दै गएको खेलको गर्मीलाई पनि संकेत गर्नेछ । रुसी भाषामा मिस्टाको अर्थ सपना हुन्छ । यो नयाँ बल आउँदो शनिबार हुने खेलमा पहिलो पटक प्रयोग हुनेछ । समूह चरणमा प्रयोग भएको बल।
