दोहोरिएला रोनाल्डोको जादु, यसपालीको विश्वकप स्पेनले जित्ने सम्भावना
आज हुने खेलमा विश्वकप दाबेदार मानिएका टोली विरुद्ध कमजोर आँकिएका टोलीहरुले चुनौती पेश गर्दैछन् ।
पोर्चुगल भर्सेज मोरक्को
यो खेल नेपाली समयअनुसार ५ बजेर ४५ मिनेटमा हुनेछ । पहिलो खेलमा स्पेनविरुद्ध बराबरी खेलेको पोर्चुगल यस खेल जित्ने दाउमा छ । ईरान विरुद्धको आफ्नो पहिलो खेल गुमाएका कारण दोस्रो चरणको यात्रा गर्ने हो भने मोरक्कोले पनि यस खेल जित्नुपर्ने हुन्छ । तर, क्रिष्ट्रियानो रोनाल्डो फर्ममा भएकाले उनलाई कसरी रोक्ने भन्नेमा मोरक्कोले निकै ध्यान दिनुपर्ने हुन्छ ।
प्रतियोगिताको पहिलो खेलमै स्पेन विरुद्ध ह्याट्रिक गरेर रोनाल्डोले आफूमाथि मार्किङ नगर्दा विपक्षीहरुले कस्तो परिणा भोग्नुपर्छ भन्ने देखाइसकेका छन् ।
उरुग्वे र साउदी अरेबिया
पहिलो खेलमै इजिप्टलाई हराउन सफल उरुग्वेले यस खेलमा जित दर्ता गरेको खण्डमा दोस्रो चरणको यात्रा गर्नेछ । यता, पहिलो खेलमा रुससँग ५–० ले पराजित भएको साउदीलाई दोस्रो चरण पुग्नका लागि राम्रो खेलेर मात्रै पुग्नेछैन । भाग्य पनि साथ दिनुपर्नेछ । कम्तिमा दोस्रो चरणको यात्राका लागि साउदीले आजको खेल जित्नु आवश्यक छ ।
तर, प्रतियोगितामा साउदी निकै कमजोर देखिएको छ । लुईस सुआरेज, इडिन्स काभानी लगायतका स्टार खेलाडीले पनि उरुग्वेका लागि सोचेजस्तो खेल्न सकेका छैनन् ।
स्पेनविरुद्ध ईरान
यो खेल नेपाली समय अनुसार ११ बजेर ४५ मिनेट जाँदा हुनेछ । स्वभाविक रुपमा स्पेनले खेल जित्ने पूर्वानुमान लगाइएको छ । तर ईरानले डिफेन्समा स्पेनलाई कडा चुनौती दिनसक्छ ।
पहिलो खेलमा ३ अंक बटुलेको ईरानको उद्देश्य आजको खेलमा स्पेनलाई बराबरीमा रोक्दै अंक खोस्नु हो । यता, पहिलो खेलमा पोर्चुगलसँग बराबरी खेलेको स्पेन आजको खेलमा स्पष्ट ३ अंक हासिल गर्न चाहन्छ । रियल म्याड्रिड र पोर्र्चुगललाई प्रशिक्षण दिइसकेका क्युरोज कार्लोसले पहिलो खेलमा मोरक्को विरुद्ध जुन रणनीति अपनाएका थिए । उक्त रणनीति सफल भएको छ ।
सुरुमा रक्षात्मक खेलको ईरानले अन्त्यतिर सेट पिस खेल्दै दबाब कायम राखेको थियो र मोरक्कोले आत्मघाती गोल गरेपछि ३ अंक पनि लियो । त्यसपछि भने टोली फेरि रक्षात्मक देखियो । स्पेनका प्रशिक्षक फर्नान्डो हियर्रोले रियलबाट खेल्दा छोटो समय कार्लोसँग प्रशिक्षण लिएका थिए ।
उनले कार्लोसको प्रशंशा गर्दै भनेका छन्, ‘हामीले ईरानलाई हल्का रुपमा लिने गल्ती गर्न हुँदैन । कार्लोसले टोलीलाई बलियो बनाएका छन् र त्यसलाई चुनौती दिन हामी संगठित रुपमा उत्रनुपर्छ ।’
स्पेनले पोर्चुगल विरुद्ध बराबरीका बाबजुद जुन धैर्यताका साथ उत्कृष्ट खेल देखायो । जसरी बल होल्ड गर्दै विपक्षीमाथि निरन्तर दबाब बनायो । स्पेनलाई त्यस्तो खेल्नबाट रोक्न ईरानले ठूलो मेहिनत त गर्नैपर्छ ।
उसलाई भाग्यले पनि साथ दिन जरुरी छ । आईसल्यान्डले अर्जेन्टिनाविरुद्ध खेलेजसरी एकत्रित भएर डिफेन्स खेल्नसके मात्रै ईरानले स्पेनलाई रोक्न सक्ने अनुमान गर्न सकिन्छ । अन्यथा, डियगो कोस्टा एक्लै विपक्षीमाथि हाबी हुनसक्ने क्षमता राख्छन् ।
