विश्वकपमा आज तीन खेल हुँदै, रुससँग हार भोगेको साउदी उरुग्वेलाई रोक्ने रणनीतिमा
रुसमा जारी विश्वकप फुटबलअन्तर्गत बुधबार तीन खेल हुँदैछन् । आज समूह ‘बी’का दुई र ‘ए’को एक खेल हुनेछन् ।
आज हुने पहिलो खेलमा समूह ‘बी’को दोस्रो चरणअन्तर्गत पोर्चुगल र मोरक्को भिड्दैछन् । यो खेल नेपाली समयअनुसार बेलुकी पौने ६ बजेदेखि मस्कोको लुझ्निकी रंगशालामा हुनेछ ।
समूहको पहिलो खेलमा पोर्चुगलले स्पेनसँग बराबरी खेल्दा मोरक्को इरानसँग पराजित भएको थियो ।
यस्तै, बेलुकी पौने ९ बजे शुरु हुने खेलमा समूह ‘ए’का दुई टोलीहरु उरुग्वे र साउदी अरबिया भिड्नेछन् । पहिलो खेलमा इजिप्टलाई हराएको उरुग्वे आज साउदी अरबयिालाई जित्दै नकआउट चरणमा पुग्ने लक्ष्यमा रहेको छ ।
पहिलो खेलमा रुससँग फराकिलो हार भोगेको साउदी आज उरुग्वेलाई रोक्ने रणनीतिमा हुनेछ ।
समूह ‘बी’को अर्को खेलमा बुधबार स्पेन र इरान भिड्नेछन् । यो खेल नेपाली समयअनुसार राति पौने १२ बजेदेखि काजान एरिनामा हुनेछ ।
