यसरी चम्किने इङ्ल्यान्डको भाग्य, कमजोर ट्युनिसियालाई इङ्ल्यान्डले जित्ने पक्का
दाबेदार मानिएका टोली स्पेन, अर्जेन्टिना, जर्मनी र ब्राजिलले विश्वकपमा पहिलो खेलमा जित निकाल्न छैनन् । यस्तो परिस्थितिमा सबै ठूला राष्ट्र दबाबमा परिसकेका छन् । सन् १९६६ को विश्वविजेता इङ्ल्यान्डले आज ट्युनिसियाको सामना गर्दैछ ।
विश्वकपमा इङ्ल्यान्डले पछिल्लो जित दर्ता गरेको ८ वर्ष वितिसकेको छ । दक्षिण अफ्रिकामा स्लोभेनिया विरुद्ध १–० को जित निकाल्न पनि इङ्ल्यान्डले निकै सङ्घर्ष गर्नुपरेको थियो ।
उक्त खेलमा सहभागी एक खेलाडी मात्रै अहिलेको विश्वकप टोलीमा अटाएका छन् । उक्त विश्वकपको अन्तिम १६ मा जर्मनीसँग पराजित हुँदै बाहिरिएको इङ्ल्यान्डले गत संस्करणको विश्वकपमा कुनै खेल जित्न सकेन ।
त्यसपछि इङ्लिस टिममा व्यापक फेरबदल हुन थाल्यो । ग्यारेथ साउथगेटले टोली सम्हालेपछि इङ्ल्यान्डले फेरि राम्रो खेल देखाउन थालेको छ ।
ग्यारी काहिल, फिल जोन्स, जोर्डन हेन्डरसन, रहिम स्ट्रलिङ र ड्यानी बेलब्याक मात्रै सन् २०१४ को विश्वकपमा सहभागी भएका खेलाडी हुन् । टोलीमा बाँकी सबै खेलाडी नयाँ छन् । त्यसैले जोश पनि राम्रै देखिएको छ ।
भोल्गोगार्ड रङ्गशालामा ट्युनिसियाविरुद्ध खेल्दा इङ्ल्यान्डको लक्ष्य नै विश्वकपका पछिल्ला चार खेलमा निकाल्न नसकेको जित हासिल गर्नु हुनेछ ।
अफ्रिकी राष्ट्र ट्युनिसियाको पनि आफ्नै महत्वाकाङ्क्षा छ । पछिल्ला मैत्रीपूर्ण खेलमा ठूला राष्ट्रलाई चुनौती दिएको ट्युनिसिया बलियो र सन्तुलित टोली हो ।
विश्वकपअघि पोर्चुगल विरुद्धको खेलमा ट्युनिसियाले बराबरी खेलेको थियो । स्पेन विरुद्धको खेलमा पनि कडा चुनौती दिएको थियो । जसका कारण स्पेनले इन्जरी समयको अन्तिम केही सेकेन्ड बाँकी रहँदा मात्रै गोल गर्न सक्यो ।
वाहबी काज्ररी र अली मालोउलजस्ता खेलाडीबाट प्रशिक्षकले ठूलो अपेक्षा गरेका छन् । टोलीका सबै खेलाडी फिट भएकाले ट्युनिसियाले उच्च आत्मविश्वासका साथ खेल्दै इङ्ल्यान्डलाई कडा चुनौती दिने देखिन्छ ।
यता, इङ्ल्यान्ड पनि अनौठो टोली छ । पछिल्ला ८ वर्षदेखि जित निकाल्न नसकेको इङ्लिस टोली दबाबरहित रूपमा मैदानमा उत्रन चाहन्छ । प्रशिक्षक ग्यारेथ बेलले खेललाई भन्दा मानसिक पक्षलाई बढी ध्यान दिएका छन् ।
ग्यारी काहिलका अनुसार विश्वकपजस्तो ठूलो प्रतियोगितामा आफ्नो प्रतिभाले ५० प्रतिशत भूमिका खेल्छ भने ५० प्रतिशत भूमिका मानसिक शक्तिले खेल्छ । युवा टोली आत्मविश्वासले भरिएको छ । प्रशिक्षक साउथगेटको एउटै दुविधा कसलाई सुरुवाती एघारमा खेलाउने भन्ने हो ।
१९९८ को झल्को
इङ्ल्यान्ड र ट्युनिसियाबीच सन् १९९८ मा पनि समूह चरणमै प्रतिस्पर्धा भएको थियो । रोचक कुरा, त्यतिबेला पनि यी दुवै टिम समूह जीमा थिए । अनि दुवै टिमले अहिलेजस्तै एकअर्का विरुद्ध भिडेर प्रतियोगिता प्रारम्भ गरेका थिए ।
फ्रान्सको मार्सेली रङ्गशालामा भएको उक्त खेलमा इङ्ल्यान्ड २–० ले विजयी भएको थियो । कप्तान एलन सियरर र पाउल स्कोल्सले एक एक गोल गरेका थिए ।
