अख्तियारमा प्रहरीको दादागिरी मौलाए पछी आयोगमा प्रहरी कटौती

अख्तियार दुरूपयोग अनुसन्धान आयोगमा प्रहरी संख्यामा कटौती हुने भएको छ । सर्वोच्च अदालतबाट आयोगको प्रमुख आयुक्तमा अयोग्य घोषित भएका लोकमान सिंह कार्कीको पालामा दरबन्दीभन्दा धेरै प्रहरीहरू काजमा राखी उनले अख्तियारलाई प्रहरीमय बनाएका थिए । निजामतीलाई भन्दा प्रहरीलाई बढी विश्वास गरी संख्या अत्यधिक बढाएपछि निजामती कर्मचारीहरू कार्कीसँग रुष्ट भएका थिए । त्यसपछि आयोगको प्रमुख बनेका दीप बस्न्यातले पनि कार्कीको निर्णयलाई निरन्तरता दिए । हालका निमित्त प्रमुख नवीन घिमिरेले प्रहरीको संख्यामा व्यापक कटौती गर्दैछन् ।

जसअनुरूप प्रहरी अधिकृत प्रमुख रहने आयोगका सम्पर्क कार्यालयहरू बर्दीवास, बुटवल, कोहलपुर र महेन्द्रनगरमा समेत अब प्रहरी प्रमुखलाई हटाएर निजामतीलाई नै कार्यालय प्रमुखको जिम्मेवारी दिने तयारी भइरहेको छ भने सम्पर्क कार्यालय, क्षेत्रीय कार्यालय र मुख्यालयमा समेत प्रहरी संख्यामा व्यापक कटौतीको तयारीमा निमित्त आयोग प्रमुख घिमिरे रहेका छन् । शतप्रतिशत अतिरित्त भत्ता पाइने भएपछि अख्तियारमा कार्यरत रहनका लागि प्रहरीहरूको तँछाडमछाडमात्रै हुँदैनथ्यो कि राजनीतिक सोर्सफोर्सका आधारमा अख्तियारमा खटिँदै आएका थिए । सरकारले आयोगमा कार्यरत कर्मचारीले पाउँदै आएको भत्तामा समेत कटौतीको तयारी गरिरहेको छ भने प्रहरीहरू धेरै फिर्ता हुने भएपछि त्यहीँ कार्यरत रहनसमेत केही प्रहरीहरू शक्तिकेन्द्र धाइरहेका छन् ।