गोरेको परिवार नै सुन तस्करीमा, भाइ सुन पठाउने, श्रीमती र प्रेमिकाले हिसाब राख्ने

तस्करीको साढे ३३ किलो सुन कहाँ छ भन्ने कुरा अझै गुमनाम रहे पनि सुन तस्करी र सनम शाक्य हत्या प्रकरणमा जोडिएका नयाँ नयाँ तथ्य भने लगातारजसो बाहिर आइरहेका छन् । साढे ३३ किलो सुन तस्करीको मुख्य योजनाकार मानिंदै आएका ‘गोल्ड डन’ ‘गोरे’ अर्थात चुँडामणि उप्रेतीको नयाँ रहस्य बाहिर आएको छ ।

सुन काण्डमा मुछिएकाहरुले मोरङ जिल्ला अदालतमा दिएको बयानले गोरेको कारोबारमा साथीभाइको मात्र सहयोग नभई परिवारकै सहयोग रहेको भेटिएको । गोरेको परिवार नै सुन तस्करीमा रहेको बयानका तथ्यहरुले उजागर गरेको छ ।

गोरेका भाइ पनि सुन तस्कर

गोरेका बुबा नेत्रप्रसाद उप्रेती प्रहरीमा जागिरे थिए । तर, बाबुको पेशामा छोराहरू भने रमाउन नसकेको उनीहरु कारोबारले स्पष्ट पारेको छ । गोरेले बाबुको दबाबमा भारतीय आर्मीबाट जागिरे जीवन त थाले तर, त्यहाँ उनी टिक्न सकेनन् । आर्मीमा लागेको एक वर्षपछि नै उनी भागेर खाडी मुलुक कुवेत पुगे । त्यहाँदेखि उनको सुन तस्करीको व्यापार शुरु भयो । गोरे आफू मात्र होइन भाइलाई समेत तस्करीको साझेदार बनाएका थिए ।

दुबईमा रहेका गोरेका भाइ रमेश उप्रेतीले तस्करीको सुन बोकाएर नेपाल पठाउने गरेको आरोप अभियोगपत्रमा छ । ३३ किलो सुन हराएको जानकारी रमेशलाई पहिले नै थियो । गोरेले फोनमार्फत् हराएको सुन खोजी भइरहेको समेत उनलाई जानकारी दिएका थिए । सनमको हत्या भएको दिन गोरेले सबैभन्दा पहिलो जानकारी दिने व्यक्ति उनै रमेश भएको अभियोगपत्रमा प्रतिवादीहरुको बयानबाट खुल्छ ।

सनमको हत्याको जिम्मा टेकराज मल्ल ठकुरी, मोहन काफ्ले र नरेन्द्र कार्कीलाई लिन लगाउने र दाइ ‘गोरे’ लाई बचाउने उनै रमेशको योजना थियो । रमेशले प्रहरीले पक्राउ गरेपछि केस मिलाउने र उनीहरूको परिवारलाई ५० लाख रुपैयाँ दिने आश्वासन समेत दिएका थिए ।
‘जे जस्तो भई गयो, तिमी र टेकराज मल्ल ठकुरी मिलेर प्रहरी समक्ष आत्मसमर्पण गर । हामी तिमीहरूलाई हेर्छौ,‘ सनमको हत्यापछि रमेशले फोनमा आफूलाई भनेको मोहन काफ्लेले बयान दिएका छन् । ३३ किलो सुन हराएपछि खोज्न लागि भन्दै रमेश भारतको सिलगुढी समेत पुगेको जनाइएको छ ।

सुनकाण्डको सहयोगीमा गोरेका श्रीमतीदेखि ससुराली र प्रेमिकासम्म

‘गोल्ड डन’ भनेर चिनिएका गोरेले आफ्नो तस्करी कारोबारमा श्रीमती, भाइलाई मात्र होइन, ससुराली र प्रेमिकालाई समेत सहयोगी बनाएको घटना अनुसन्धान र आरोपीहरुको बयानबाट खुलेको छ । यतिसम्मकी उनको कारोबारमा मुख्य लगानीकर्ता नै श्रीमती र प्रेमिका देखिएका छन् । भोजपुर घर भई हाल गौरीघाटमा बस्दै आएकी रक्षा भण्डारी गोरेकी प्रेमिका भएको अनुसन्धानमा संलग्न स्रोतले जानकारी दिएको छ । रक्षाका बाबु रुद्राक्षको व्यापार गर्छन् । २०६९ सालदेखि गोरेले रक्षालाई सुन तस्करीमा संलग्न गराएको र ‘गोरे’ विदेशमा भएका बेला सम्पूर्ण आर्थिक कारोबार रक्षाले गर्ने गरेको अनुसन्धानमा खुलेको छ ।

स्रोतले दावी गर्छ, ‘गोरेले सम्पूर्ण आर्थिक हिसाब किताब रक्षाको जिम्मा लगाएका थिए ।’ गोरेले अवैधरुपमा विमानस्थलबाट भित्र्याएको सुन उनकै कोठामा लगेर राख्ने गरेको समेत खुलेको हो । सुन तस्करीमा लागेपछि रक्षाको जीवनस्तर नै बदलिएको छ । श्रीमती, भाइ र प्रेमिकालाई मात्र होइन गोरेले ससुरालीलाई पनि सुन तस्करीमा संलग्न गराएको देखिएको छ । ६३ जनालाई प्रतिवादी बनाएको अभियोग पत्रमा गोरेका काका ससुरा समेत कारोबारमा संलग्न देखिएका छन् ।प्रतिवादी बनाएर अदालतमा मुद्दा दायर भए पनि फरार रहेका अर्जुनप्रसाद खरेल गोरेका काका ससुरा हुन् । मोरङ गोविन्दपुर गाविस बस्ने ३८ वर्षीय खरेलको गोरेसँग सुन तस्करीमा संलग्न देखिएको छानबिन समितिको ठहर छ । ‘गोरे’ की श्रीमती निरु भनिने नर्वदा खरेलले पनि आर्थिक व्यवस्थापनमा गोरेलाई सहयोग गरेर थप तस्करी गर्न उक्साएको स्पष्ट । निरु गोरेको कुकर्मलाई लुकाउन र तस्करीको सम्पतिमा रमाउनतिर लागेको आरोपितहरुको बयानले स्पष्ट पारेको छ ।नयाँपेजबाट