आइजीपी बनाईदिनु भन्दै बालुवाटार पुगेका एक घण्टा कुरेर रित्तै फर्किए,यी हुन् चिफ बनाउन दलाली गर्दै पैसा उठाउने
नेपाल प्रहरी र सशस्त्र प्रहरी बल दुवै संगठनका प्रमुख पद रिक्त हुन ७ दिनमात्र बाँकी हुँदा बीचौलियाहरुको चलखेल तीव्र भएको छ । सरकारले वर्तमान आइजीपीलाई बिदा बस्न लगाएर नयाँ आइजीपी नबनाएका कारण बीचौलियाहरुले सक्रिय हुने मौका पाएका छन् ।
एमाले र माओवादी केन्द्रका नेता–कार्यकर्तादेखि प्रधानमन्त्री केपी शर्मा ओली र गृहमन्त्री रामबहादुर थापा बादल र उनका सल्लाहकारकोमा आइजीपी बनाउने बीचौलियाहरुको दौडधूप चलिरहेको छ । प्रधानमन्त्री केपी शर्मा ओलीले दुवै संगठनका आइजीपीका दाबेदारहरुलाई भेट नदिने भने पनि सोमबार बेलुका सशस्त्र प्रहरी बलका एआइजी शैलेन्द्र खनाल बालुवाटार पुगेका थिए । तर भेट नदिएपछि उनी एक घन्टा बसेर फर्किएको स्रोतले बताएको छ ।
यसैगरी सशस्त्र प्रहरी बलको मानवस्रोत विभागका लेखाअधिकृत गणेशबहादुर मल्लले खनाललाई आइजीपी बनाउनका लागि देशभरका लेखापालहरुसँग सहयोग संकलन गर्न लागेको स्रोतले बताएको छ । स्रोतका अनुसार उनले लेखापालहरुलाई आइजीपी बनाउनका लागि आर्थिक सहयोग माग गरेका छन् ।
आइजीपीका दाबेदारहरु विगतमा जे जसरी डीआइजी र एआइजीमा बढुवा भए पनि ट्रयाक रेकर्ड हेरेर बनाउने चर्चा सुरु भएपछि सशस्त्रका खनाल बढी नै भयभीत भएका छन् । बिजय गच्छदारलाई प्रभावमा पारी एसएसपीबाट डीआइजीमा पहिलो नम्बरमा बढुवा भएका र डीआइजीबाट एआइजी बढुवा हुँदा सिनियर डीआइजी उत्तम खड्कालाई रोकेका खनाल ट्रयाक रेकर्ड हेर्ने भएपछि भयभीत भएका छन् । उनले आइजीपी हुनका लागि प्रधानमन्त्री, गृहमन्त्रीका आसेपासे, नेताहरुको मात्र नभएर नेताका सवारी चालकलाई समेत निकै महत्व दिएका छन् ।
जलस्रोत तथा ऊर्जामन्त्री बर्षमान पुनका पूर्व सवारी चालक सुरज अधिकारीलाई पनि एआइजी खनालले आइजीपी बढुवा हुनका लागि परिचालन गरेका छन् । अधिकारीको रासोबासो नै अहिले सशस्त्रको मानवस्रोत विभागमा हुने गरेको छ । पुनका पूर्व सवारी चालक अधिकारीले सशस्त्रका सिपाही हवल्दारदेखि एपीएफ क्लवका कलाकारहरुलाई समेत हाकिमले झैं थर्काउने गरेका छन् ।
