एमालेका कार्यकर्तालाई माओबादीमा प्रवेश गराउदै प्रचण्डले भने-बराबरीको कुरा टुंगिएपछि मात्र पार्टी एकता

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले बैशाख ९ गते पार्टी एकता गर्ने समझदारी भएको बताएका छन्।
ललितपुरको खुमलटारमा रौतहटका पार्टी कार्यकर्ताको पुनर्मिलन तथा पार्टी प्रवेश कार्यक्रमलाई सम्बोधन गर्दै उनले एकताको दिन नेपालबाट शान्ति, समृद्धि र एकताको सन्देश दिने योजना रहेको बताए।

‘अहिले आन्तरिक तयारी गर्ने र प्रधानमन्त्री भारत भ्रमणबाट फर्केर आएपछि एकताको कुरा टुंग्याएर बैशाख ९ मा एकता गर्ने समझदारी बनेको छ’, दाहालले भने, ‘त्यो दिन लाखौं जनताको उपस्थितिमा नेपाल नयाँ युगतिर प्रवेश गरेको सन्देश दिन्छौं।’

उनले अब एकतामा जाँदा दुवै पार्टीको बराबरी हैसियत र नयाँ चुनाव चिह्नको कुरा मिल्न बाँकी रहेको बताए।

कार्यक्रममा रौतहटबाट दुई दर्जन कार्यकर्ता विभिन्न पार्टी परित्याग गरी माओवादी केन्द्रमा प्रवेश गरेका थिए।