उपेन्द्र यादवको पार्टीमा पहिरो, केन्द्रीय सचिव अजम्बरले पार्टी छाडे, माओवादी प्रवेशको तयारी

 संघीय समाजवादी फोरमका केन्द्रीय सचिव अजम्बर राई काङमाङले पार्टी छाडेका छन् । उनी शुक्रवार एक कार्यक्रमबीच नेकपा माओवादी केन्द्रमा प्रवेश गर्दैछन् । अजम्बरले एमाले र माओवादी दुवै पार्टीका नेताहरुसँग कुरा गरेरै आफू कम्युनिस्ट आन्दोलनमा फर्किन लागेको प्रतिक्रिया दिए । ५ वर्षअघि नेकपा एमालेमा जातीय सवालमा फरक मत राख्दै अशोक राई, बिजय सुब्बाहरुसँगै विद्रोह गरेका अजम्बरले एकल संकिर्णताबाट मुक्त हुन आफू पुनः कम्युनिस्ट पार्टीमा फर्किएको बताए । माओवादी अध्यक्ष प्रचण्डसँग छलफल भएर केही सैद्धान्तिक विषयमा समझदारीसहित प्रवेश गर्न लागेको उनले पुष्टि गरे ।

२०१९ सालबाट टुक्रिएको नेपालको कम्युनिस्ट आन्दोलन पुनर्गठनको प्रक्रिया शुरु भएको छ । यो अवसरमा म आफूलाई कम्युनिस्ट पार्टीमै जोड्न चाहान्छु । एउटै कम्युनिस्ट केन्द्रमा रहेर योगदान दिनका लागि म फर्किएको हुँ ।’ संघीय समाजवादी फोरमले उठाएका कतिपय कुरा राम्रा भए पनि बिबिधताकोमात्र कुराले एकल संकिर्णतामा फसिने रहेछ ।

काङमाङ संघीय समाजवादी पार्टी खोल्नुअघि एमालेमा केन्द्रीय कमिटीका सदस्य थिए । युवा संघका पूर्वअध्यक्ष समेत रहेका काङमाङ एमालेभित्र प्रखर बौद्धिक नेताका रुपमा चिनिन्थे । तर उनी एमालेमा नफर्की किन माओवादी प्रवेश गर्न लागेका छन् । एमालेसँग पनि सल्लाह भएरै आफू माओवादी प्रवेश गरेको उनले बताए ।

उनले भने- एमाले र माओवादी एउटै हिमश्रृंखलाबाट अघि बढेका दुई धार हुन् । दुई तीन दिनमा भेटिइहाल्छन् एउटै भँगालोमा । अहिले म माओवादी प्रवेश गरेको भन्दा पनि कम्युनिस्ट आन्दोलनमा फर्किएको हुँ । मेरो अपर्झटको यो निर्णयले संसफोमा बसेका धेरै साथीहरुले सम्पर्क गरिरहनुभएको छ । यो निर्णय भनेको उनीहरुका लागि विद्रोहको वाणी हो । एमालेबाट विद्रोह गरेका तत्कालिन नेताहरुमध्ये बिजय सुब्बा यसअघिनै एमालेमा फर्किसकेका छन् । वीरबहादुर लामा र रिजवान अन्सारीले पनि सो पार्टी छाडिसकेका छन् । काङमाङ गत मंसिरको निर्वाचनमा भोजपुरको प्रदेशसभा निर्वाचन क्षेत्र ‘क’बाट उम्मेदवार बनी एमालेका राजेन्द्र राईसँग निकट प्रतिस्पर्धी भएका थिए ।