सभामुखमा कांग्रेसले उम्मेदवारी नदिने,महरा यसरी हुने भए निर्बिरोध सभामुख
माओवादी केन्द्रले सभामुख पदमा कृष्णबहादुर महरालाई उम्मेदवार बनाउने निर्णय गरेको छ।
पार्टी अध्यक्ष पुष्पकमल दाहाल प्रचण्ड निवास खुमलटारमा बसेको केन्द्रीय सचिवालय बैठकले महराको नाममा सर्वसम्मति गरेको नेता देव गुरुङले बताए। माओवादी केन्द्रबाट पटक-पटक मन्त्री भइसकेका महराले पछिल्लो समय सभामुखमा दाबी गर्दै आएका थिए। माओवादी केन्द्रभित्र महरालाई सभामुख बनाउन शीर्षस्थ नेताबीच समेत समझदारी बनेको थियो। सोही कारण नयाँ सरकारमा सहभागी हुन महराले दाबी छाडेका थिए।
सभामुख पदमा नयाँ अनुहार ल्याउने संकेत गर्दै माओवादी केन्द्रका अध्यक्ष दाहालले यस पटक पनि सो पदमा रोल्पाली नै दोहोरिने बताएका थिए।
पूर्व सभामुख ओनसरी घर्तीले समेत सभामुख पदमा दोहोरिने इच्छा देखाउदै आएकी थिइन्। सभामुखमा देव गुरुङ, गिरिराजमणि पोखरेल, अग्नि सापकोटा लगायतका नेताले दाबी गर्दै आए पनि माओवादी केन्द्रले सभामुख पदमा महरालाई अगाडि सार्ने निर्णय गरेको हो।
सभामुखको निर्वाचन भोलि शनिबार हुँदैछ। मनोनयनका लागि आज बिहान १० देखि १ बजेसम्म समय निर्धारण गरिएको संसद् सचिवालयले जनाएको छ।
यता नेपाली कांग्रेसले सभामुख पदमा उम्मेदवारी नदिने भएको छ।
राष्ट्रपति पदमा वाम गठबन्धनविरुद्ध उम्मेदवार उठाउने निर्णय गरेको कांग्रेसले सभामुख पदमा भने उम्मेदवारी नदिने बताएको हो।
कांग्रेसका एक नेताका अनुसार सभामुख सिंगो सदनको नेता हुने भएकाले सो पदमा प्रतिस्पर्धा नगर्ने तयारी पार्टीले गरेको हो। ‘राष्ट्रपति पदमा समेत सोही तर्कमा भिन्नता देखिन सक्छ, त्यसको आफ्नै महत्व थियो तर सभामुख पदमा प्रतिस्पर्धा नगर्ने तयारी पार्टीको छ,’ ती नेताले भने।
वाम गठबन्धनको सहमति अनुसार सभामुखमा माओवादी केन्द्रले उम्मेदवार उठाउनेछ। जसलाई एमालेले समेत समर्थन गर्ने भएपछि वाम गठबन्धनका उम्मेदवारको जित निश्चितजस्तै छ। त्यसैले समेत कांग्रेसले उम्मेदवार नउठाउने निर्णय गर्न लागेको हो।
‘संसदको गणित हामी सबैलाई थाहा छ, सभामुखमा प्रतिस्पर्धा नगरौं भन्ने मनसाय हाम्रो हो,’ कांग्रेसका ती नेताले भने।
