ओलीका मन्त्रीले कर्मचारीलाई भने- विदेश गएर के हेर्छौ,हिमाल हेर्ने भए पठाईदिन्छु,खराबका लागी मात्र हो म खतरा
‘गढबढ गर्ने कर्मचारीका लागि मात्रै म खतरा हुँ, राम्रो काम गर्नेका लागि म मित्रवत व्यबहार गर्छु,’ ओली सरकारका उद्योग वाणिज्य तथा आपूर्ति मन्त्री मातृका यादवको यो भनाई यतिबेला चर्चामा छ ।
मन्त्रीको कार्यभार सम्हालेपछि कर्मचारीलाई समयमै उपस्थित हुन निर्देशन दिँदै उनले भनेको यी शब्द सामाजिक सञ्जालमा समेत निकै भाइरल बनिरहेको छ । कुनै समय वन मन्त्री रहँदा भ्रष्टाचार गरेको भन्दै तत्कालिन ललितपुर जिल्लाका स्थानिय विकास अधिकारीलाई शौचालयमै थुनेर चर्चामा आएका यादव ओली सरकारमा शक्तिशाली मन्त्री छन् । उनी आएसँगै ‘ठग कर्मचारी’को निद हराम शुरु भएको छ ।
यता अर्का पात्र उत्तिकै चर्चामा छन् । उनी हुन् जनसंख्या तथा वातावरण मन्त्री लालबाबु पण्डित ।
‘हिमाल हेर्न मन लागे नेपालमै छ । पहाड पनि नेपालमै छ । समथर भूभाग हेर्न मनलागे तराई गए हुन्छ विदेश गइराख्नु पर्दैन,’ विदेश भ्रमणमा दौडिरहने कर्मचारीलाई सचेत पार्दै उनले भनेका थिए ।
तत्कालिन प्रधानमन्त्री सुशील कोइराला नेतृत्वको सरकारमा रहँदा सामान्य प्रशासन मन्त्री सम्हालेका पण्डितले डिभि र पिआरधारी कर्मचारीको जागिर खोसेका थिए । त्यसैकारण उनी चर्चामा थिए ।
वमगठबन्धन सरकारमा उनीहरु दुई मात्रै होइन अधिकांश मन्त्री कम छैनन् ।
सरकार विस्तारको क्रममा रहेका प्रधानमन्त्री ओली सरकार गठनको शुरुवाती चरणमा सफल देखिएका छन् ।
खासगरी विषय विज्ञ र व्यक्तिगत स्वभावको आधारमा नेताहरुलाई ‘फिट’ मन्त्री चयन गरेर ओलीले सकारात्मक शुरुवात गरेको देखिन्छ ।
कुनै समय डिभि पिआरधारी कर्मचारीलाई ‘ठेगान’ लगाएर चर्चामा आएका लालबाबु पण्डित र घुसखोरी कर्मचारीलाई शौचालयमा थुनेर चर्चित बनेका अर्का मन्त्री मातृका यादवको चयनले पनि समाजिक सञ्जालमा ओली सरकारको ‘जय–जयकार’ शुरु हुँदैछ । त्यतिमात्रै होइन विषय विज्ञताको हिसाबले समेत अर्थमन्त्रीमा डा. युवराज खतिवडालाई चयन गरिएपछि पनि ओली सरकारको ‘परिपक्वतामा’ विश्वास बढ्न थालेको छ ।
यता रुसमा शैन्य विज्ञानको अध्ययन गरेर आएका माओवादी केन्द्रका प्रभावशाली नेता तथा गृहमन्त्री राम बहादुर थापा बादलको उपस्थितिले पनि ओली सरकारलाई थप बल दिएको छ ।
‘यो निकै सकारात्मक शुरुवात हो । व्यक्तिगत क्षमताका आधारमा मन्त्री चयन भएको देखिन्छ,’ एक पूर्व सचिव भन्छन्,‘अब आउने पात्रहरु पनि यसरी नै छनौट भए ५ वर्षमा मुलुकमा केही परिवर्तन पक्कै हुन्छ ।’
केही विज्ञ भने अनावश्यक रुपमा राज्य मन्त्री थप्न नहुने पक्षमा छन् । ‘यो सरकारमा राज्य मन्त्री भन्ने पद नै श्रजना गर्नु हुन्न । यो विल्कुल अनावश्यक पद हो,’ नेपाल सरकारबाट अवकास प्राप्त एक पूर्व मुख्य सचिव भन्छन्,‘मन्त्री र सचिव भए मन्त्रालय गज्जबले चल्छ । किन चाहियो राज्य मन्त्री !’
उनको सुझाव मान्ने हो भने ओली सरकारले सानो तर चुस्त टिम बनाउनु उत्तम हुन्छ । बाँकी मन्त्रालयमा पनि क्षमतावान र इच्छाशक्ति भएका नेताहरु ल्याउन सके ओली सरकारको भविष्य सुन्दर हुने देखिन्छ ।
