सकियो ओली प्रचण्डबीचको ‘वान टू वान’ वार्ता, भएन ठोस सहमती

पार्टी एकताबारे छलफल गर्न एमाले अध्यक्ष केपी ओली र माओवादी केन्द्रका अध्यक्ष प्रचण्डबीचको ‘वान टू वान’ वार्ता सकिएको छ ।

भक्तपुरको सानोठिमीस्थित व्यवसायी दुर्गा प्रसाईंको घरमा भएको ओली र दाहालबीचको ५ घण्टा लामो छलफलले पार्टी एकताको लागि अझै गृहकार्य नपुगेको भन्दै थप छलफल गर्ने निर्णय गरेको ओलीका प्रेस संयोजक चेतन अधिकारीले जानकारी दिए ।

“बैठकमा पार्टी एकता र मन्त्रीपरिषद्का बारेमा छलफल भएको थियो । पार्टी एकताको लागि बीचबीचमा दुई अध्यक्षबीच बसेर टुङ्गयाउने सहमति भएको छ । दुई पार्टीका अध्यक्षले पार्टी एकताको काम सकेपछि मात्र एकता संयोजन समितिको बैठक बस्छ,” अधिकारीले भने ।

पार्टी एकताको सम्बन्धमा ओली र दाहालबीच थप छलफल आवश्यक भएको भन्दै आज बस्ने भनिएको पार्टी एकता संयोजन समितिको बैठक स्थगित भएको पनि अधिकारीले जानकारी दिए । “आज एकता संयोजन समितिको बैठक बस्ने भनिएको थियो । तर, उहाँबीचहरुको छलफल नै बाँकी रहेको देखियो, त्यसैले बैठक नबस्ने निर्णय गरेको छ,”अधिकारीले भने ।