ओली-प्रचण्डको गोप्य वार्ता ललितपुरबाट भक्तपुर सर्यो,ओलीका कारण एकता नहुने चित्रबहादुरको ठोकुवा
पार्टी एकता र मन्त्रिपरिषद् बिस्तारमा सहमति जुटाउन प्रधानमन्त्री केपी शर्मा ओली र माओवादी अध्यक्ष प्रचण्ड आज निर्णायक छलफलमा जुटेका छन् ।
दुई नेताको वार्ता भक्तपुरको पुरानो ठिमीस्थित मेडिकल कलेज सन्चालक दुर्गा प्रसाईंको घरमा चलिरहेको छ ।
झापाको विर्तामोडस्थित बी एण्ड सी मेडिकल कलेजका सन्चालक प्रसाईं माओवादी अध्यक्ष प्रचण्ड निकट व्यवसायी हुन् । वर्षमान पुनमार्फत उनी माओवादीमा हावी भएको मानिन्छ । बी एण्ड सी कलेज सम्बन्धनको पर्खाइमा छ ।
यसअघिका एकता बार्ता माओवादी निकट निर्माण व्यवसायी शारदाप्रसाद अधिकारीको मानभवनस्थित निवासमा हुने गरेका थिए ।
पार्किङलगायतका सुबिधाका कारण बार्तास्थल प्रसाईं निवास रोजिएको प्रचण्डका एक सहयोगीले बताए । दुई नेतावीच शनिवार ओली निवास बालकोटमै वार्ता भएको थियो । शीर्ष तहको बार्तापछि पार्टी एकता संयोजन समितिको बैठक बस्ने बताइएको छ ।
यता मधेसकेन्द्रित राजपा, नेपाल र संघीय समाजवादी फोरम, नेपालले केपी ओली नेतृत्वको सरकारमा सहभागी हुने विषयमा ग्रिन सिग्नल देखाएका छन् ।
संविधान संशोसध र मधेस मुद्दा सम्बोधन गर्न ओली लचिलो भए राजपा र फोरम सरकारमा साभागी हुने विषयमा छलफल गर्न सकारात्कम देखिएका हुन् । प्रधानमन्त्री ओलीले प्रधानमन्त्री हुनुअघि राजपा अध्यक्षमण्डल संयोजक महन्थ ठाकुर र संघीय समाजवादी फोरम अध्यक्ष उपेन्द्र यादवसँग छुट्टछुट्टै भेट गरी आफ्नो नेतृत्वमा बन्ने सरकारलाई सहयोग गर्न आग्रह गरेका थिए ।
स्रोतका अनुसार ओलीले ठाकुरसँग काठमाडौंको एक होटलमा र यादवसँग आफ्नै निजी निवास बालकोटमा कुराकानी गरेका थिए ।वार्तामा ओलीले आफू संविधान संशोधन विरोधी नभएको भन्दै मधेसलाई समेटेर अघि बढ्ने बताएका थिए ।
नीत नेताबीच बीच सरकार गठन हुनअघि अर्को चरणमा कुराकानी गर्ने सहमति भएको थियो ।
तर, माओवादी केन्द्रसँगको एकता प्रक्रियामा ओली व्यस्त भएकाले अर्को चरणको कुराकानी नभएको स्रोतको भनाइ छ ।
उता राष्ट्रिय जनमोर्चाका अध्यक्ष चित्रबहादुर केसीले भारतको ईशारामा केपी ओलीले माओवादी केन्द्रलाई बाहिर राखेर मधेस केन्द्रित दलहरूसँग मिलेर सरकार बनाउन लागेको आरोप लगाएका छन् ।
प्रगतिशील पत्रकार संघ नेपाल रुपन्देहीले शनिबार बुटवलमा आयोजना गरेको पत्रकार सम्मेलनमा अध्यक्ष केसीले भारतकै डिजाइनमा ओली चलिरहेको आरोप लगाए । ‘केपी ओली पनि खासै भरोसाका मान्छे होइनन् । उनी पनि भारतकै ईशारामा चलेको देखियो’, उनले भने, ‘माओवादीसँग पार्टी एकीकरण गर्न पनि चाहेका छैनन् । सरकारमा प्रचण्डको पार्टीलाई लैजाने कुनै पनि संकेत देखिएन । भारतकै ईशारामा ओलीले प्रचण्डलाई बाहिर राखेर मधेस केन्द्रित दलहरूसँग मिलेर सरकार बनाउन लागेको पो देखियो ?’
एमाले र माओवादी केन्द्रबीच पार्टी एकीकरणको विषय टाडिँदै गइरहेका बेला जनमोर्चाका अध्यक्ष केसीले यस्तो खुलासा गरेका हुन् ।
हुन पनि पछिल्लो समय ओलीले माओवादीलाई भन्दा मधेस केन्द्रित दलहरूसँग वार्ता र सम्वाद चलाइरहेका छन् । मधेस केन्द्रित दलहरू पनि सरकारमा जान तयार भएर बसेको आरोप लाग्दै आएको छ ।
