आज बस्ने भनेको एकता संयोजन समितिको बैठक स्थगित,ओली र प्रचण्ड बीच यसरी मिलेन कुरा
वाम एकता (एमाले र एकीकृत माओवादी एकीकरण) को प्रयासलाई अन्तिम रुप दिन आइतबारका लागि बस्ने भनिएको एकता संयोजन समितिको बैठक स्थगित भएको छ ।
नेकपा एमालेका अध्यक्ष तथा प्रधानमन्त्री केपी शर्मा ओली र एकीकृत नेकपा माओवादीका अध्यक्ष पुष्पकमल दाहाल प्रचण्डबिच शनिबार बालकोटमा भएको वार्तापछि आइतबारका लागि एकता संयोजन समितिको बैठक बस्ने तय भएको थियो ।
तर दुई पार्टीका अध्यक्षबिच नै एकताका विषयमा मिल्न बाँकी कुरामा सहमतिको खाँचो रहेको र त्यसका लागि दुई शीर्ष नेताबिच अन्तिम चरणाको वार्ताको खाँचो रहेको भन्दै एकता संयोजन समितिको बैठक स्थगित गरिएको हो ।
हिजो बालकोटमा वार्ता गरेका ओली र प्रचण्डबिच आइतबार बिहान ११ बजेपछि भक्तपुरमै माओवादीका एक कार्यकर्ताको घरमा गोप्य छलफल हुने तय भएको छ । ओली र प्रचण्डबिच आइतबार लामो वार्ता हुने र एकतामा बाधा बनेर तेर्सिएका तगारो हटाउने प्रयास हुने स्रोतले बताएको छ ।
आइतबारको ओली–प्रचण्ड वार्ता वाम एकताका लागि ‘ब्रेक–थ्रु’ बनाउने तयारी रहेको स्रोतको दाबी छ । ओली–प्रचण्ड वार्तापछि सोमबार एकता संयोजन समितिको बैठक बस्ने सम्भावना रहेको नेताहरुले बताएका छन् ।
ओली–प्रचण्डबिचको वार्ताको स्थान खुलाईएको छैन भने दुई अध्यक्षबिच के–के विषयमा कुरा मिल्न बाँकी छ भन्ने कुरा पनि बाहिर आएको छैन ।
सिद्धान्त तथा पदीय भागबण्डामा कुरा अड्किँदा गएको बुधबारपछि एकता संयोजन समितिको बैठक बस्न सकेको थिएन ।
तर शनिबार एमाले अध्यक्ष तथा प्रधानमन्त्री केपी शर्मा ओली र एमाओवादीका अध्यक्ष पुष्पकमल दाहाल प्रचण्डबिच बालकोटमा भएको छलफलले रोकिएको एकता छलफलको बाटो फेरि खोलेको थियो ।
अड्किएको एकता प्रक्रिया शनिबार ओली र प्रचण्डबिच भएको बालकोट वार्ताले अघि बढाएको देखिए पनि आइतबार फेरि एकता संयोजन समितिको बैठक स्थगित गरेर दुई अध्यक्ष गोप्य छलफलमा बस्नुले मिल्न बाँकी कुरा अझै रहेको देखिन्छ । यसलाई चिर्न दुवै पक्षका नेतामा ग्याग गर्न सक्ने खुबीको खाँचो भने रहेको छ ।
