प्रधानमन्त्री शेरबहादुर देउवाले आजै राजीनामा दिने
प्रधानमन्त्री शेरबहादुर देउवाले बुधबार पदबाट राजीनामा दिने मनस्थिति बनाएका छन् ।
निर्वाचन आयोगले प्रतिनिधिसभाको परिणाम राष्ट्रपतिलाई बुझाउने तयारी गरेसँगै देउवा राजीनामा दिने सोचमा पुगेको एक मन्त्रीलाई उद्धृत गर्दै कान्तिपुरले समाचार लेखेको छ ।
आयोगले बुधबार प्रतिनिधिसभामा निर्वाचित सांसद्को सूची राष्ट्रपतिलाई हस्तान्तरण गर्नासाथ नयाँ सरकार निर्माण प्रक्रिया अघि बढ्ने छ ।
राजधानीबाट प्रकाशित भएका अखबारहरुको प्राथमिकतामा आज पनि एमाले–माओवादी एकता प्रक्रिया परेको छ । पत्रपत्रिकाहरुले विभिन्न शीर्षकमा यो विषयलाई आज छापेका छन् । केही पत्रिकाले वाम एकता सरकार गठनअघि हुने लेखेका छन् भने केहीले एकता संयोजन समितिबाट एकता टुंग्याउने तयारी भइरहेको दाबी गरेका छन् ।
सांसद् सिफारिस गर्दा तीन दलले बुझाएको सूची नमिलेको र आयोगले सच्याएर पठाउन गरेको आग्रहलाई पनि आजका पत्रपत्रिकाहरुले नछुटाइकन लेखेका छन् । समावेशीसमूहको प्राथमिकताक्रम अनुसार दलले सूची नबुझाएपछि आयोगले पुनः यसलाई सच्याउन भनेको पत्रपत्रिकाले लेखेको समाचारमा उल्लेख छ ।
पाँचवटा प्रदेशमा सरकार गठनको प्रक्रिया अघि बढे पनि ६ र ७ मा भने ढिलाइ भइरहेको छ । आजका पत्रपत्रिकाहरुले कहाँ, कसरी प्रदेश सरकार गठन हुँदैछन् भन्नेबारे पनि चर्चा–परिचर्चा गरेका छन् ।
शिक्षामन्त्री गोपालमान श्रेष्ठले पदबाट बाहिरिनै लाग्दा मन्त्रिपरिषद् बैठकको निर्णयविपरीत बुधबार एक दर्जन नर्सिङ कलेजलाई सम्बन्धन दिन लागेको समाचार कान्तिपुर दैनिकमा छ भने अन्नपूर्ण पोस्ट दैनिकले दर्दनाक घरेलु हिंसाको चित्र प्रस्तुत गरेको छ ।
सरकारमा सहभागी हुनेबारे राजपामा विवाद बढेको, प्रदेश ४ मा मन्त्रीको आकांक्षी धेरै हुँदा व्यवस्थापन पेचिलो बनेको लगायत समाचारलाई पनि आजको पत्रपत्रिकाले महत्त्व दिएर छापेको छ ।
