रातारात ओली र प्रचण्डले गरे यस्तो सहमति, बिद्यालाई बम्पर उपहार अरु क–कसको खुल्दैछ भाग्य?
नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डवीच राष्ट्रपति, उपराष्ट्रपति, सभामुख र प्रदेश सरकार गठनको लागि मन्त्रिमण्डलमा भागवण्डा गर्ने सहमति भएको छ । उनीहरुबीच राष्ट्रपति, उपराष्ट्रपति, सभामुखमा पुरानै व्यक्तिलाई दोहोर्याउने विषयमा पनि मोटामोटी समझदारी भएको छ ।
पार्टी एकताको आन्तरिक गृहकार्यमा जुटेका वाम गठबन्धनका शीर्ष नेताद्धय ओली र प्रचण्डवीचको छलफल अहिले प्रदेश सरकारमा केन्द्रीत छ । प्रदेशपछि केन्द्र सरकार र राष्ट्रपति, उपराष्ट्रपति र सभामुख टुंगो लगाउने समझदारी भएको गठबन्धननिकट उच्च स्रोतले जनायो ।
वाम गठबन्धनका एक शीर्ष नेताका अनुसार प्रदेश सरकारको मन्त्रिमण्डलमा करिब सहमति भइसकेको छ । ३५ प्रतिशत र ६५ प्रतिशतमा भागबण्डा हुनेछ। प्रदेश सरकार गठनपछि केन्द्रिय सरकारको भागवण्डा गरिनेछ।
केन्द्रिय सरकार बनाउन पनि ६० र ४० को अनुपातमा जाने उनीहरुवीच सहमति भएको खुलासा भएको छ । स्रोतका अनुसार पहिला सरकार गठन गर्ने र त्यसपछिमात्रै पार्टी एकताको विषयमा प्रवेश गर्नेपनि ओली र प्रचण्डवीच गोप्य सहमति भएको छ ।
माओवादी केन्द्रका अध्यक्ष प्रचण्डले ओलीलाई प्रधानमन्त्री बनाउन प्रस्ताव गरेका छन् । उनीहरुवीच राष्ट्रपतिमा वर्तमान राष्ट्रपति विद्यादेवी भण्डारीलाई दोहोर्याउने कि भन्नेबारे समेत हालै छलफल भएको छ । यद्यपी एमालेभित्रै नयाँ व्यक्तिलाई राष्ट्रपति बनाउनुपर्नेमा आवाज उठिरहेको छ ।
सभामुखमा माओवादीले पाए पूर्व सभामुख ओनसरी घर्तीमगरलाई नै दोहोर्याउने सम्मको बहस चलेको छ । उपराष्ट्रपति पनि आफ्नो भागमा पाए माओवादीले हालका उपराष्ट्रपति नन्दबहादुर पुनलाई नै दोहोर्याउने भएको छ ।
प्रदेशमा मन्त्री भागवण्डा कसरी ?
पार्टी एकताको आन्तरिक गृहकार्यमा जुटेका ओली र प्रचण्डवीच प्रदेश सरकारमा मन्त्री कसलाई बनाउने भन्नेबारे केही दिनयता छलफल भैरहेको छ । माओवादीले मुख्यमन्त्रीको टुँगो लगाइसकेको छ । माओवादीको भागमा परेको प्रदेश नम्बर ६ र ७ मा उसले मुख्यमन्त्रीको नाम करिब–करिब टुंगो लगाएको छ । ६ नम्बर प्रदेशमा पूर्वमन्त्री महेन्द्र बहादुर शाही र ७ नम्बर प्रदेशमा त्रिलोचन भट्ट बन्ने भएका छन् । माओवादीको कोटामा परेका सभामुखको पनि नाम प्रचण्डले करिब करिब टुँगो लगाएका छन् ।
यता एमालेले आफ्नो कोटामा परेका १, ३, ४ र ५ नम्बर प्रदेशको मुख्यमन्त्रीमा सहमतिमै टुँगो लगाउने भएको छ । प्रदेश नम्बर १ मा सचिव भीम आचार्य र पूर्वमन्त्री शेरधन राईवीच कडा प्रतिष्पर्धा भैरहेको छ । यी दुईमध्ये एक जना मुख्यमन्त्री बन्ने भएका छन् । ३ नम्बर प्रदेशमा राजेन्द्र पाण्डे र अष्टलक्ष्मी शाक्यले आफ्नो दाबेदारी प्रस्तुत गरेका छन् ।
४ नम्बर प्रदेशमा पृथ्वीसुब्बा गुरुङ र किरण गुरुङवीच प्रतिष्पर्धा देखिएको छ । तर यो प्रदेशमा सहमतिमै आलोपालो चलाउन नेतृत्वले दबाब दिएको छ । ५ नम्बर प्रदेशमा सचिव शंकर पोखरेल नै मुख्यमन्त्री बन्ने पक्का छ ।
एमाले वरिष्ठ नेता एवं पुर्वप्रधानमन्त्री झलनाथ खनालले पनि राष्ट्रपतिमा दावी गरेका छन् । भण्डारी राष्ट्रपति हुनुअघि उनी एमाले पदाधिकारी थिइन्। भण्डारीले एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल लगायतसँग राष्ट्रपतिमा दोहोरिन ईच्छा दर्शाएकी छिन् ।
