पार्टी एकता गर्न वाम गठबन्धनको बैठक ओली निबासमा बस्दै,यस्तो बन्दैछ एकताको मोडालिटी
वाम गठबन्धनको पार्टी एकता संयोजन समितिको बैठक आज बस्दैछ।
लामो समयको आन्तरिक गृहकार्यपछि एमाले र माओवादीका शीर्ष नेता सम्मिलित गठबन्धनको बैठक औपचारिक रुपमा बस्न लागेको हो। सिंहदरबारस्थित एमाले संसदीय दलको कार्यालयमा बैठक बस्ने भनिए पनि विशेष कारणवश एमालेमा पार्टी अध्यक्ष केपी ओलीको निवास बालकोट भक्तपुरमा बस्नेछ।
बैठक दिउँसो ३ बजे बस्ने तय भएको माओवादी अध्यक्षको निजी सचिवालयले जनाएको छ।
एकीकृत पार्टीको नेतृत्वको विषयमा कुरा नमिल्दा एकताले गति लिन सकेको छैन। नेतृत्वको विषयमा सहमति जुट्न नसक्दा एकता संयोजन समितिले गठन गर्ने भनिएको सांगठनिक र वैचारिक विषय मिलाउने कार्यदल बन्न नसकेको हो। आजको बैठकमा दुई कार्यदल बनाउने तयारी छ।
चुनावी परिणामपछि राष्ट्रियसभा निर्वाचन र प्रादेशिक सरकारमा सहमतिमै सिट बाँडफाँट गरेका दुवै दल नयाँ सरकार गठनअगाडि नै पार्टी एकताको खाकामा सहमति जुटाउन अन्तिम गृहकार्य गरिरहेका छन्।
