राष्ट्रपति विद्यादेवी भण्डारी राष्ट्रिय सभा गठनसम्वन्धि सरकारले अघि सारेको अध्यादेश जारी गर्ने मनस्थितीमा पुगेकी छिन् । दलहरुबीच बिवाद देखिएकाले रोकेर राखेको अध्यादेश दलीय सहमतिको ‘ग्रीनसिग्नल’ पाउनेबित्तिकै जारी गर्ने राष्ट्रपति कार्यालय श्रोतले जानकारी दिएको छ । यस विषयमा राष्ट्रपतिले लगातार परामर्श गरिरहेकी छन् । बिहीबार विहानमात्रै उनले माओवादी केन्द्रका अध्यक्ष पुष्पकमल दाहाल प्रचण्डसँग अध्यादेशकै विषयमा दोश्रो पटक छलफल गरिन् । उनले आजै एमाले अध्यक्ष ओली संग पनि छलफल गरिन।एमालेको स्थायी समिति बैठक राखेर ओलीले अध्यादेश पास गर्न पहल गर्ने जानकारी दिए संगै सरकार गठनको गाँठो फुक्ने भएको छ ।
अध्यादेश जारी नभएसम्म राष्ट्रिसभा चुनावको बाटो नखुल्ने र चुनाव नभएसम्म प्रतिनिधिसभाको पूर्ण परिणाम आएर सरकार गठनसमेत नहुने देखिएपछि एमाले-माओवादी अध्यादेश पारित गर्ने विषयमा लचिलो देखिएका छन् ।
एमाले अध्यक्ष केपीओली र माओवादी केन्द्रका अध्यक्ष प्रचण्डबीच बुधबार यस विषयमा पनि छलफल भएको थियो । प्रचण्डले बुधबार ओलीसँगको छलफलको निस्कर्ष सुनाउदै सरकार गठनको बाटो छिटो खोल्न पनि राष्ट्रपतिसमक्ष आग्रह गरेको श्रोतको दावी छ । संसदमा पेश गरेको बहुमतीय प्रणालीलाई छोडेर सरकारले राष्ट्रपति समक्षएकल संक्रमणीय प्रणालीबाट राष्ट्रिय सभा गठन गर्ने गरि अध्यादेश पेश गरेपछि सत्तारुढ र विपक्षी दलबीच विवाद चर्कदै आएको थियो ।
