समानुपातिकको यस्तो छ पछिल्लो अपडेट, कांग्रेस र एमालेबीच कति फरक पर्यो ?
समानुपातिक तर्फको मतगणना अन्तिम चरणमा पुगेको छ। एमाले र कांग्रेसको समानुपातिक मत हाराहारीमा पुगेको छ। पछिल्लो अपडेटअनुसार एमालेले ३० लाख १९ हजार ६२६ मत पाएको छ भने नेपाली कांग्रेसले २९ लाख ४७ हजार ६३७ मत सहित एमालेलाई पछ्याई रहेको छ ।
माओवादी केन्द्रले अहिलेसम्म जम्मा १२ लाख १५ हजार ७४५ मत पाएको छ ।चौथौ स्थानमा रहेको मधेस केन्द्रित दल संघिय समाजवादी फोरमले ४ लाख २८ हजार ९६१ मत पाएको छ भने ४ लाख ९ हजार १८९ मत ल्याउदै राष्ट्रिय जनता पार्टी (राजपा) पाँचौ स्थानमा छ। अहिलेसम्म तीन प्रतिशतको थ्रेसहोल्ड यीनै पाँच दलले मात्रै कटाएका छन् ।
नयाँ दलको रुपमा चर्चामा आएको विवेकशील साझालाई तीन प्रतिशतको थ्रेस होल्ड पार गर्न कठिन हुने देखिएको छ। अहिलेसम्म २ लाख १ हजार १९८ मत ल्याउदै छैठौं स्थानमा छ भने कमल थापा नेतृत्वको राप्रपाले १ लाख ९० हजार १४८ मत पाएको छ। राप्रपाको संभावना पनि अब लगभग सकिएको छ।
पशुपति शम्शेर राणा नेतृत्वको राष्ट्रिय प्रजातन्त्र पार्टी (प्रजातान्त्रिक) ले ८३ हजार ३१५ मत ल्याएको छ भने बाबुराम भट्टराई नेतृत्वको नयाँशक्ति नेपालले ७६ हजार ५०६ मत पाएको छ ।
नारायणमान विजुक्जे नेतृत्वका नेपाल मजदुर किसान पार्टीले ५२ हजार ८३६ मत ल्याएको छ । अन्य केहि साना दलहरुले ३ लाख २३ हजार ७२० मत पाएका छन् । समानुपातिक तर्फको मतगणना शुक्रबार साँझसम्ममा सकिने निर्वाचन आयोगले जनाएको छ । पाँच राजनीतिक दलले मात्रै राष्ट्रिय दलको मान्यता पाउने भएका छन्। नेकपा एमाले, नेपाली कांग्रेस, नेकपा माओवादी केन्द्र, संघीय समाजवादी फोरम र राष्ट्रिय जनता पार्टी(राजपा)ले मात्रै ३ प्रतिशत मत कटाएका छन्। ३ प्रतिशत मत ल्याउने दलले मात्रै राष्ट्रिय दलको मान्यता पाउने कानुनी व्यवस्था छ।
