प्रचण्ड चितवनमै थन्किए,ओली र देउवाले यसरी देशै घन्काए
प्रतिनिधिसभा र प्रदेशसभा निर्वाचन अन्तर्गत दोस्रो चरणमा मंसिर २१ गते हुने मतदानका लागि दलका शीर्ष नेताहरु चुनावी प्रचारप्रसारमा व्यस्त छन् ।
निर्वाचन नजिकिएसँगै सबैजसो दलका नेता तथा उम्मेदवारहरु ठूलठूला आमसभादेखि घरदैलो कार्यक्रममा व्यस्त भएका छन् ।
आगामी निर्वाचनमा मुख्य गरी लोकतान्त्रिक गठबन्धन र वाम गठबन्धनबीच चुनावी प्रतिस्पर्धा हुने भएकाले यी गठबन्धनका शीर्ष नेताहरु आफ्नो निर्वाचन क्षेत्रमात्र नभई आफ्नो गठबन्धनका सबै उम्मेदवारका लागि भोट मागिदिन देश दौडाहमै निस्किएका छन् ।
मंसिर १० गते ३२ जिल्लामा मतदान भइसकेकाले शीर्ष नेताहरु २१ गते मतदान हुने ४५ जिल्लाको चुनावी दौडाहमा रहेका छन् । त्यतिमात्र नभई दलहरुले विभिन्न राष्ट्रिय मिडियाबाट चुनावी प्रचारप्रसारलाई तीब्र पारेका छन् ।
शेरबहादुर देउवा
प्रधानमन्त्री एवम् नेपाली कांग्रेसका सभापति शेरबहादुर देउवा पनि चुनावीसभाहरुमा व्यस्त रहेका छन् । उनले एकै दिन ३ देखि ४ वटा जिल्लामा आयोजना हुने सभाहरुलाई सम्बोधन गर्ने कार्यतालिका बनाएर प्रचारप्रसारमा व्यस्त भएका छन् । देउवाले वामहरुले जिते लोकतन्त्र नै समाप्त पार्ने र अधिनायवाद स्थापित गर्ने भन्दै मतदातालाई लोकतान्त्रिक उम्मेदवारहरुलाई विजयी बनाउन आग्रह गर्दै आएका छन् ।
देउवाले बुधबार स्याङ्जा, गुल्मी र नवलपरासीमा नेपाली कांग्रेसले गर्ने चुनावीसभालाई सम्बोधन गर्दैछन् ।
केपी शर्मा ओली
नेकपा एमालेका अध्यक्ष एवम् वाम गठबन्धनका नेता केपी शर्मा ओली पनि तीब्ररुपमा देश दौडाहमा छन् । मंगलबार राजधानीका दुई चुनावी सभालाई सम्बोधन गरेका ओलीले बुधबार गृह जिल्ला झापाकाे दमक लगायतका ठाउँमा हुने चुनावीसभाहरुलाई सम्बोधन गर्दैछन् ।
आफ्ना भाषणहरु कांग्रेसको विरोधमा केन्द्रित गरेका ओलीले अबको सरकार वाम गठबन्धनकै बन्ने भन्दै कांग्रेसलाई भोट दिएर नपछुताउन आग्रह गर्दै आएका छन् ।
प्रचण्ड
नेकपा माओवादी केन्द्रका अध्यक्ष एवम् वाम गठबन्धनका अर्का नेता पुष्पकमल दाहाल प्रचण्ड आफ्नो निर्वाचन क्षेत्रमै केन्द्रित बनेका छन् । चितवनको क्षेत्र नं. ३ बाट प्रतिनिधिसभा सदस्य उम्मेदवार रहेका प्रचण्ड अरु उम्मेदवारको प्रचारमा त्यति निस्किन सकेका छैनन् ।
आफ्नो निर्वाचन क्षेत्रमा कडा प्रतिस्पर्धा हुने देखिएपछि आफ्नो जित सुनिश्चितताका लागि प्रचण्डलाई घरदैलो कार्यक्रम नै गर्नु पर्ने भएको छ ।
पुत्र प्रकाशको निधनअघि चितवन बाहिरका सभाहरुमा पनि सम्बोधन गर्न पुगेका प्रचण्ड त्यसपछि भने आफ्नो निर्वाचन क्षेत्रबाट बाहिर निस्किन सकेका छैनन् ।
बुधबार प्रचण्डले चितवनको क्षेत्र नम्बर ३ का मंगलपुर, शिवनगर र शुक्रनगरमा हुने चुनावी कार्यक्रमलाई सम्बोधन गर्ने भएका छन् ।
