काँग्रेसका महतलाई यसरी पछार्दै छन् इश्वर पोखरेलले

काठमाडौँ । आसन्न निर्वाचनमा काठमाडौँ निर्वाचन क्षेत्र नं ५ मा नेकपा (एमाले)का महासचिव ईश्वर पोखरेल र नेपाली काँग्रेसका नेता एवं पूर्व परराष्ट्रमन्त्री डा प्रकाशशरण महतबीच नै मुख्य प्रतिस्पर्धा हुने देखिएको छ ।

यस क्षेत्रमा विभिन्न दल र तीन स्वतन्त्र गरी प्रतिनिधिसभा सदस्यका लागि कूल २० जनाले उम्मेदवारी दिनुभएको छ । प्रतिनिधिसभा सदस्यका उम्मेदवार काँग्रेस नेता डा महतलाई लोकतान्त्रिक गठबन्धनमा आबद्ध दलहरुको समर्थन छ भने एमाले महासचिव पोखरेल वाम गठबन्धनका तर्फबाट प्रतिनिधिसभा सदस्य उम्मेदवार बन्नुभएको हो ।

दुवै उम्मेदवारले यस क्षेत्रका विकास निर्माणका मुद्दालाई प्राथमिकतामा राखेर चुनाव प्रचार र घरदैलो अभियानलाई तीव्रता दिनाका साथै मतदातालाई आकर्षित गरिरहनुभएको छ । पोखरेल यस क्षेत्रबाट तेस्रोपटक उम्मेदवार हुनुभएको हो भने महत यस क्षेत्रमा पहिलोपटक निर्वाचनमा भिड्दै हुनुहुन्छ ।

महासचिव पोखरेल यसअघि २०६४ र २०७० सालका दुवै संविधानसभाको निर्वाचनमा काँग्रेस नेता नरहरि आचार्यसँग पराजित हुनुभएको थियो । यस क्षेत्रमा अन्य उम्मेदवार पनि चुनावी प्रचारप्रसारमा व्यस्त रहे पनि बढी चर्चा भने महत र पोखरेलको नै छ ।

महासचिव पोखरेल यस क्षेत्रमा दुईपटक पराजय भोगिसकेकाले योपटक काँग्रेस किल्ला भत्काएर निर्वाचन जित्ने रणनीतिमा लाग्नुभएको छ । उता डा महतले काँग्रेसले दुईपटक सहजै विजय हासिल गरेको भन्दै यस क्षेत्रमा आगामी निर्वाचनमा पनि काँग्रेसले नै जित्ने आँकलन गरेर नै काठमाडौँ क्षेत्र नं ५ रोज्नुुभएको हो ।

प्रतिनिधिसभा सदस्यका लागि यस क्षेत्रमा उम्मेदवारी दिनुभएका अन्य उम्मेदवारहरु विवेकशील साझा पार्टीका उज्ज्वलबहादुर थापा, नेकपा (माले) का दीपक पुनमगर, संघीय समाजवादी फोरमका लक्ष्मी राई, राष्ट्रिय जनता पार्टी नेपालका भानुकुमार खड्कालगायत २० जना पनि चुनावी मैदानमा हुनुहुन्छ ।

विसं २०३५ देखि काठमाडौँ–३ बाँसबारीमा बसोबास गर्दै आउनुभएका काँग्रेस नेता डा महतले यस क्षेत्रभित्रका नगरहरुलाई व्यवस्थित र सुन्दर शहरका रुपमा विकास गर्न सडक निर्माण, स्तरोन्नति, खानेपानी, ढल तथा फोहर व्यवस्थापन, सार्वजनिक शौचालय, व्यवस्थित प्रतीक्षालय, पार्किङस्थल र बजारको व्यवस्थित विकासका लागि निरन्तर क्रियाशील रहने प्रतिबद्धता व्यक्त गर्नुभएको छ ।

उहाँ भन्नुहुन्छ, “टोखा नगरको ऐतिहासिक, पौराणिक एवं सांस्कृतिक धरोहरलाई संरक्षण गरी स्तरोन्नति गर्ने, शिवपुरी राष्ट्रिय निकुञ्ज आसपासका बस्तीलाई स्थानीय पर्यटनस्थलका रुपमा व्यवस्थित गर्न मेरो प्रयास जारी रहनेछ ।”

नेता डा महतले यस क्षेत्रमा अवस्थित बूढानीकण्ठमा अवस्थित पौराणिक, ऐतिहासिक र धार्मिकस्थलको बृहत्तर र सुव्यवस्थित विकास तथा रानीवन क्षेत्रलाई संरक्षण गरी व्यवस्थित नमूना पार्क निर्माण गरी समुदायको हितमा प्रयोगमा ल्याउने योजना अघि सार्नुभएको छ ।

यस क्षेत्रमा काठमाडौँ महानगरपालिकाका वडाहरु २, ३, ४ र ५ तथा टोखा नगरपालिकाका वडाहरु २, ३, ४, ५, ६ र ७ पर्छन् । त्यस्तै बूढानीलकण्ठ नगरपालिकाका ३, ४, ५, ६ र ७ पनि यस क्षेत्रअन्तर्गत पर्छन् ।

काठमाडौँ ५ अन्तर्गत दुवै प्रदेशसभा निर्वाचनमा पनि काँग्रेस र एमालेकै उम्मेदवारको चर्चा छ । प्रदेश ‘क’ मा काँग्रेसका रमा पौड्याल गुरागार्इं र एमालेका नारायणबहादुर सिलवालको उम्मेदवारी छ । प्रदेश ‘क’ मा विभिन्न दल र स्वतन्त्र गरी कूल १४ उम्मेदवार छन् ।

त्यस्तै प्रदेश ‘ख’ मा काँग्रेसका उम्मेदवार रमेशकुमार खड्का र एमालेका उम्मेदवार दीपक निरौलाको चर्चा छ । प्रदेश ‘ख’ मा विभिन्न दल र स्वतन्त्र गरी कूल १५ जनाले उम्मेदवारी दिनुभएको छ । कूल ६४ हजार ५५० मतदाता रहेको यस निर्वाचन क्षेत्रमा ३१ मतदानस्थलमा ७६ मतदान केन्द्र रहेको निर्वाचन अधिकृत चाणकमणि अर्यालले जानकारी दिनुभयो ।

महासचिव पोखरेलले यस क्षेत्रलाई देशकै ‘अस्पताल हब’ बनाउन स्थानीय जननिर्वाचित संस्था, प्रदेश सरकार र केन्द्रीय सरकारलाई क्रियाशील बनाउने प्रतिबद्धता व्यक्त गर्नुभएको छ ।

उहाँले ‘मनमोहन ज्येष्ठ नागरिक सदन’ ‘स्वरसम्राट नारायण गोपाल प्रतिष्ठान’ अन्तर्गत अडोटोरियम हल निर्माण, इतिहास बोकेको हाँडीगाउँको विकासलाई विशेष जोड दिने उल्लेख गर्नुभएको छ ।

पूर्व उपप्रधानमन्त्रीसमेत रहनुभएका उहाँ भन्नुहुन्छ, “राजधानीसँग जोडिएको शिवपुरी राष्ट्रिय निकुञ्जलाई केन्द्रित गरी पर्यावरणीय पर्यटन, साइक्लिङ जोनको प्रवद्र्धन, भ्यू टावर निर्माणमा जोड दिनेछु । महिला गरिब तथा विपन्न समुदाय र बेरोजगार युवालाई लक्षित गरी रोजगारी र स्वरोजगारीका अवसर सिर्जना गरेर अघि बढ्न प्रोत्साहित गर्नेछु ।”

काठमाडौँलगायत ४५ जिल्लामा यही मंसिर २१ गते प्रतिनिधिसभा र प्रदेशसभा सदस्यको निर्वाचन दोस्रो चरणमा हुँदैछ । ३२ जिल्लामा भने मंसिर १० गते पहिलो चरणमा निर्वाचन सम्पन्न भइसकेको छ ।

निर्वाचन जित्न पोखरेललाई वाम गठबन्धनका र डा महतलाई लोकतान्त्रिक गठबन्धनका सबै मत तान्नैपर्ने चुनौती देखिन्छ । निर्वाचनमा कसले बाजी मार्ला भनेर हेर्न भने मंसिर २१ को निर्वाचन र मतपरिणाम कुर्नैपर्छ ।