विनाविभागीय मन्त्रीलाई माओवादी केन्द्रले फिर्ता बोलाउने,देउवा र प्रचण्डको के मा भयो लफडा
नेकपा माओवादी केन्द्रले सरकारमा सहभागी आफ्ना मन्त्रीलाई फिर्ता बोलाउने तयारी गरेको छ । प्रदेश र प्रतिनिधि सभा निर्वाचनको सुनिश्चिता नभएसम्म सरकार नछोड्ने निर्णय गरेको माओवादी केन्द्रले जिम्मेवारीबाट हटाइएका आफ्ना विनाविभागीय मन्त्रीलाई फिर्ता बोलाउने तयारी गरेको हो ।
शीर्ष नेता र केही मन्त्रीहरु मनोनयन दर्ताका लागि जिल्ला पुगेकाले फर्किएपछि सरकारबाट बाहिरिएको औपचारिक निर्णय गरिने स्रोतले बतायो ।
निर्वाचनको सुनिश्चितता नभएको भन्दै सरकारमै रहने निर्णय यसअघि गरेपनि अब निर्वाचन हुने पक्का भइसकेकाले सरकारबाट बाहिरिन लागेको हो ।
शीर्ष नेता र मन्त्री काठमाडौं आइपुगेपछि सम्भव भएसम्म सोमबारै नभए मंगलबारसम्म सरकारबाट मन्त्री फिर्ता बोलाइने स्रोतले बतायो ।मन्त्री फिर्ता बोलाउने तयारी भएपछि प्रधानमन्त्री देउवा खुसी भएका छन् ।
सरकारको प्रमुख घटक माओवादी केन्द्र प्रदेश र प्रतिनिधि सभा निर्वाचनमा एमालेसँग चुनावी गठबन्धन गरेर जाने घोषणा गरेपछि प्रधानमन्त्री शेरबहादुर देउवाले सरकार छोडेर सहयोग गर्न आग्रह गरेका थिए ।
माओवादी केन्द्रका अध्यक्ष पुष्पकमल दाहाल प्रचण्डसँगको भेटमा प्रधानमन्त्री देउवाले माओवादी केन्द्रको समर्थन अब आफूलाई आवश्यक नरहेको भन्दै सरकारबाट आफ्ना मन्त्री फिर्ता बोलाउन भनेका थिए । प्रचण्डले सरकारबाट मन्त्री फिर्ता बोलाउने प्रतिबद्धता प्रधानमन्त्री देउवासँगको भेटमा जनाएपनि निर्वाचन सार्न लागेको गोप्य सूचना पाएको भन्दै माओवादीले सरकार नछोड्ने निर्णय लिएको थियो ।
पटक–पटक सरकार छोड्न आग्रह गरेपनि अटेर गरेपछि प्रधानमन्त्री देउवाले माओवादी केन्द्रका मन्त्रीहरुको जिम्मेवारी खोसेर विनाविभागीय बनाएका थिए ।
