शर्मालाई थप ६ दिन हिरासतमा राख्न म्याद थप
काठमाडौं । विशेष अदालतले आन्तरिक राजस्व विभागका महानिर्देशक चूडामणि शर्मालाई थप अनुसन्धानका लागि ६ दिनको म्याद थपेको छ । अख्तियारले दोस्रोपटक म्याद थपका लागि शुक्रबार विशेष अदालतमा पेस गरेको थियो । नयाँ पत्रिकाले समाचार छापेको छ ।
अनुसन्धानको प्रकृति, गम्भीरता र जटिलतालाई हेरेर शर्मामाथि थप अनुसन्धान गर्न म्याद थप गरिएको विशेष अदालतका रजिस्ट्रार भीमकुमार श्रेष्ठले जानकारी दिए । अख्तियारले शर्मामाथि अनुसन्धान गर्न एक महिनाको समय माग गर्दै अदालतमा निवेदन दिएको थियो । न्यायाधीश भूपेन्द्र राई, नरेन्द्र सिवाकोटी र महेश पुडासैनीको इजलासबाट ६ दिनका लागि म्याद थप दिइएको रजिस्ट्रार श्रेष्ठले जानकारी दिए ।
उनका अनुसार कर फर्स्यौट आयोगमार्फत ब्याज मिनाहाका विषयमा थप बुझ्नका लागि म्याद थप गरिएको हो । रजिस्ट्रार श्रेष्ठले अख्तियार दुरुपयोग अनुसन्धान आयोगको ऐनमै अनुसन्धानको प्रकृति र जटिलतालाई ध्यान दिएर ६ महिनासम्म थुनामै राखेर अनुसन्धान प्रक्रिया अघि बढाउन सकिने व्यवस्था गरिएको स्पष्ट पारे ।
