आर्थिक वृद्धिदर महत्वाकांक्षी भएको चेम्बरको ठहर
काठमाडौँ । नेपाल चेम्बर अफ कमर्सले आर्थिक वर्ष २०७४–०७५ को लागि सरकारले सार्वजनिक गरेको बजेट मिश्रित भएको जनाएको छ । चेम्बरले विज्ञप्ति प्रकाशित गरी यस्तो प्रतिक्रिया दिएको हो ।
विज्ञप्तिमा भनिएको छ, ‘राम्रा कुराहरु हुँदाहुँदै पनि धेरै सुधार गर्नुपर्ने देखिएको छ ।’ विषम् परिस्थितिमा आएकाले बजेटमा व्यवस्था गरिएका संघीयता कार्यान्वयन, भूकम्पबाट क्षतिग्रस्त संरचनाको पुनर्निर्माण, रोजगारीका अवसरमा वृद्धि, उत्पादन र उत्पादकत्व वृद्धिको लक्ष्य हासिलमा शंका रहेको चेम्बरको प्रतिक्रिया छ । यस्तै, राष्ट्रिय गौरवका आयोजना कार्यान्वयनमा तीव्रता, कृषिको आधुनिकीकरण, व्यावसायिक र यान्त्रिकीकरण साथै सडक, रेलमार्ग र अन्तर्राष्ट्रिय विमानस्थल निर्माण र स्तरोन्नति, पर्यटन पूर्वाधार र विकास प्रवर्द्धन, शिक्षा, स्वास्थ्य, खानेपानी र सरसफाईमा लगानी, बैंक तथा वित्तीय संस्थाको नियमन र व्यवस्थित सञ्चालनमा चुनौति देखिएको चेम्बरको धारणा छ । चेम्बरले अत्यावश्यक उपभोग्य बस्तुको सहज आपूर्ति, भण्डारण र वितरण प्रणालीलाई विशेष महत्व दिइनु सकारात्मक पक्ष रहेको समेत जनाएको छ ।
आर्थिक वृद्धिको लक्ष्य बढी नै महत्वाकांक्षी छ । आर्थिक वृद्धि लक्ष्य हासिल गर्न विनियोजित बजेट पूर्णरुपमा खर्च गर्न सकियो भने मात्रै सम्भव देखिएको चेम्बरले जनाएको छ ।
