महासचिव पोखरेल र नेत्रविक्रम चन्दबीच भेटवार्ता
नेकपा एमालेका महासचिव शंकर पोखरेल र नेकपा महासचिव नेत्रविक्रम चन्द (विप्लव) बीच भेटवार्ता भएको छ । आइतबार बिहान पोखरेल निवासमा भएको दुई घण्टा लामो भेटघाटमा विप्लवको कृषि कर्म, कम्युनिस्ट आन्दोलन लगायतका विषयमा छलफल भएको थियो ।
महासचिव पोखरेललाई भेट्न विप्लव आइतबार बिहान नौ बजे शंकर पोखरेलको निवास पुगेका थिए । आफ्नो निवासमा विप्लवलाई स्वागत गर्दै पोखरेलले सुरुमै विप्लवको कृषि कर्मको प्रशंसा गरेका थिए ।
पोखरेलको भनाइ उद्धृत गर्दै भेटमा सहभागी एमाले अन्तर्राष्ट्रिय विभाग सदस्य गोपाल खनालले भने, ‘कमरेडको खेती प्रणालीले देशभर राम्रो सन्देश गएको छ । त्यसलाई किसान र व्यवसायसँग जोड्दै उत्पादन र नाफाबीच तालमेल मिलाउन सकियो भने झन् राम्रो होला ।
जनतालाई श्रममा जोड्ने र नाफासँग सन्तुलन राखेर अघि बढे राम्रो परिणाम दिने पोखरेलको सुझाव थियो । पोखरेलले विप्लवको उत्पादन संकृतिलाई आफूले सकारात्मक रूपमा लिएको बताएका थिए ।
कम्युनिस्ट ध्रुवीकरण र समाजवादी मोर्चाका कुरा
लुम्बिनी प्रदेशका कम्युनिस्ट नेताद्वय पोखरेल–विप्लवबीचको भेटको चाँजोपाँजो नेकपा एमालेका अन्तर्राष्ट्रिय विभाग सदस्य गोपाल खनाल र नेकपाका अन्तर्राष्ट्रिय विभाग सदस्य खगेश्वर केसीले मिलाएका थिए । भेटमा उनीहरू पनि सहभागी थिए ।
केसीले भेटमा भएका छलफलका विषयबारे स्पष्ट बताएनन् । उनले भने नेपालमा कम्युनिस्ट आन्दोलनको समस्या, सहकार्य र मोर्चाबारे छलफल भयो र यस्ता छलफललाई आगामी दिनमा पनि निरन्तरता दिने कुरा भयो । तर बैठक स्रोत भन्छ प्रचण्ड नेतृत्वको नेकपा माओवादी केन्द्र र विप्लव नेतृत्वको नेकपाबीच हुने भनिएको एकताको प्रगतिदेखि प्रचण्डको मतिसम्म छलफल भयो ।
विप्लवले प्रचण्डले एकतामा चासो नदिएकोबारे पोखरेलसँग खुलेर कुराकानी गरेका थिए । ‘सुरुमा एकताको राम्रै कुरा भएको हो । मलाई महासचिव बनाउने पनि भन्नुहुन्थ्यो । तर अहिलेसम्मको अवस्था हेर्दा एकता गर्न उहाँले नै इच्छा नदेखाएको जस्तो बुझिन्छ विप्लवको भनाइ उद्धृत गर्दै स्रोतले भन्यो ।
त्यसपछि एमाले महासचिव पोखरेलले पनि प्रचण्डको बोली र व्यवहारले गर्दा विश्वास गर्न गाह्रो हुने अनुभव सुनाएका थिए । पोखरेलले समाजवादी मोर्चालाई पनि प्रचण्ड र माधव नेपालले आफ्नो स्वार्थ अनुकूल चलाउन खोजेको र सरकारमा पुगेपछि भुलेको उदाहरण दिएका थिए ।
त्यसमा विप्लव पनि सही थालेका थिए । विप्लवका अनुसार जुन उद्देश्यले प्रचण्डले समाजवादी मोर्चा गठनको पहल गरे, त्यसअनुसार गतिविधि नभएको बताएका थिए । अहिले यो मोर्चा सक्रिय छैन, योबाट पनि केही होलाजस्तो लाग्दैन विप्लवको भनाइ उद्धृत गर्दै स्रोतले भन्यो । यही भूमिका बाँध्दै विप्लवले पोखरेलको सैद्धान्तिक र वैचारिक क्षमतालाई नेपालका कम्युनिस्ट पार्टीको एकता एवं ध्रुवीकरणमा उपयोग गर्न सुझाव दिएका थिए ।
विप्लवले केपी शर्मा ओली नेतृत्वको अघिल्लो सरकार र नेकपाबीच भएको तीन बुँदे सहमति कार्यान्वयन नहुँदा आफ्ना कतिपय कार्यकर्ताहरु अहिले पनि जेलमा रहेको भन्दै महासचिव पोखरेलको ध्यानाकर्षण पनि गराएका थिए ।
पोखरेलले आगामी दिनमा पनि यस्ता छलफल र भेटघाटलाई निरन्तरता दिनुपर्ने बताएका थिए । त्यसपछि विप्लव अर्को एउटा बैठकमा जानुपर्ने छ भन्दै छुट्टिएका थिए । सोही दिन विप्लवले नेकपा माओवादी केन्द्रका उपमहासचिवद्वय वर्षमान पुन अनन्त र जनार्दन शर्मा प्रभाकरसँग पनि भेटवार्ता गरेका थिए ।
