जसपा नेता यादवले भने: मधेश नेपालबाट अलग भएरै छोड्छ
प्रहरीको खोजीमा रहेका जसपा नेता अशोक यादवले आफ्नो कर्तुतलाई राजनीतिक र साम्प्रदायिक रंग दिने प्रयास गरेका छन् । एक भिडिओ वक्तव्य जारी गर्दै उनले मधेस नेपालबाट अलग भएरै छोड्ने आपत्तिजनक अभिव्यक्तिसमेत दिए । अज्ञात स्थलबाट हिन्दी भाषामा जारी गरेको भिडिओ वक्तव्यमा यादवले भारतको बिहार राज्य सरकारलाई गुहारेका छन् । नेपालमा आफूमाथि शोषण दमन भएको भन्दै उनले विदेशी राज्यसँग सहयोगको याचना गरेका हुन् । उनले भनेका छन्, ‘मधेशमा नागरिकतादेखि तमाम अपराध गरेर मधेसीलाई विदेशी बनाउने चलखेल भइरहेको थियो दमन गरिएको थियो र त्यसको खिलाफ मधेसमा आन्दोलन भएको थियो । मधेस जनविद्रोहमा म पनि सामेल थिएँ । मलाई पुलिस प्रशासनले टर्चर गर्यो । तर जनताको शक्तिले म बाहिर रहेँ र मधेस सरकारको गठन भयो । भारतले नेपालका सबै आन्दोलनकारीलाई शरण दिँदै आएको उनले सम्झाएका छन् । नेपाल प्रहरीले आफूलाई पक्राउ गर्न कुनै सहयोग मागेको खण्डमा नदिन यादवले याचना गरेका छन् ।
‘भारतमा नेपालका आन्दोलनकारीलाई शरण मिल्दै आएको छ । आन्दोलनकारी भनेका कुनै अपराधी र हत्यारा होइनन् । सर्लाहीको एसपी र डीएसपीले गुण्डागर्दी गरे । उनीहरू मेरो रिस्तेदारको घरमा गएर छापा मारिरहेका छन् । म बिहार सरकारलाई आग्रह गर्छु कि यो राजनीतिक मामला हो । हामी आन्दोलनको लडाइँ अहिले पनि लडिरहेका छौँ । यसमा भारतको सपोर्ट मिल्नुपर्छ । भारत र बिहारको लोग नभए हामीमाथि अझै जुर्म हुन्थ्यो । म बिहारका पुलिस प्रशासनलाई आग्रह गर्छु कि नेपालको एसपीले भनेर कुनै पनि कदम नउठाउनु । उनीहरूको नश्लिय भेदभाव गर्ने मान्छेहरू हुन्,’ यादवले भनेका छन् । थप बरबराउँदै उनी भन्छन्, ‘नेपालमा मधेशीमाथि दमन र शोषण हुँदै आएको छ । यी नस्लवादी, खसवादीहरूले आज पनि नेपालमा मधेशीलाई दोस्रो दर्जाको नागरिक भनिरहेका छन् । यो देशबाट मधेश अलग हुनुपर्छ । दमन र शोषणले गर्दा आउने दिनमा विद्रोह हुने सम्भावना छ ।
