अब देश अघि बढ्छ : अध्यक्ष ओली

 

 

नेकपा (एमाले) का अध्यक्ष केपी शर्मा ओलीले नयाँ सत्ता समीकरणले देशलाई ओरालो लाग्नबाट रोक्ने बताउनुभएको छ ।
बिहीबार नेकपा एमाले ताप्लेजुङको पार्टी कार्यालय भवन उद्घाटन कार्यक्रमलाई सम्बोधन गर्दै अध्यक्ष ओलीले अहिलेको सत्ता समीकरणमा एमाले पनि भएकोले देशलाई ओरालो लाग्न नदिने बताउनुभएको हो । एमालेको प्रधानमन्त्री र एमालेको एकल सरकार हुँदा जस्तो काम गर्न नसकिए पनि अहिलेको सरकाले देशलाई बरबादीमा जानबाट भने जोगाउने उहाँकाके भनाइ छ । ‘अब ओरालो लाग्ने क्रम रोकियो देशको, त्यो ओरालो लाग्ने क्रम रोकिएको छ, अब देश ओरालो लाग्दैन’, ओलीले भन्नुभयो। हिजो गठबन्धन सरकार हुँदा विकास निर्माणका काम ठप्प भएका बताउँदै अध्यक्ष ओलीले ती काम अब अगाडि बढ्ने आश्वासन दिनुभयो । सरकारले रोकिएका विकास निर्माणका काम फेरि अगाडि बढाउने अध्यक्ष ओलीको विश्वास छ । एमाले सरकारबाट हटेपछि विकास निर्माणका काम रोक्ने र राष्ट्रियतालाई कमजोर बनाउने काम भएको ओलीले बताउनुभयो । ‘हामीलाई सरकारबाट हटाउने जुन तिकडम भयो, षडयन्त्र भयो, जालझेल भयो, त्यो सबै कुरा यो देशलाई अगाडि बढ्न नदिने उद्देश्यका साथ भएको थियो, यो देशको राष्ट्रियतालाई कमजोर पार्ने उद्देश्यका साथ भएको थियो’, ओलीले भन्नुभयो ।

उहाँले मिसन २०८४ बाट एमालेलाई राष्ट्रिय शक्ति बनाउनु पर्नेमा जोड दिनुभयो । त्यसले राष्ट्रियतालाई बलियो बनाउने र विकास र समृद्धिको गति अघि बढ्ने उहाँको भनाइ छ । एमालेलाई सानदार बहुमत सहितको निर्णायक शक्तिको रूपमा अघि बढाउनु पर्ने अध्यक्ष ओलीले स्पष्ट पार्नुभयो । एमालेले राष्ट्रियतालाई बलियो बनाउने, मिचिएको भू–भागलाई देशको नक्सामा ल्याउने, कहिल्यै पनि नाकाबन्दी नलाग्ने अवस्था सिर्जना गर्ने, नेपाललाई सार्वभौमसत्ता सम्पन्न मुलुकको रूपमा स्थापित गर्ने काम गरेको उहाँले स्मरण गराउनुभयो । राष्ट्रियता, विकास, सुशासनको गति रोक्न एमाले विरुद्ध षडयन्त्र भएको बताउँदै ओलीले त्यसलाई एमालेले असफल गराइदिएको उहाँको भनाइ छ । उहाँले बैशाख १५ गते हुने इलाम–२ को प्रतिनिधि सभा र बझाङको प्रदेश सभा निर्वाचनमा एमालले जित्ने र जित्नु पर्ने बताउनुभयो । अब एमालेले सबै ठाउँमा जित्दै जाने उहाँले दाबी गर्नुभयो । एमाले नेता कार्यकर्तालाई देशलाई शिरमा राखेर काम गर्न आग्रह गर्नुभयो । त्यसो गरियो भने मात्र मिसन २०८४ सफल हुने ओलीले स्पष्ट पार्नुभयो । कुरा आदर्शका गर्ने तर आफूलाई फाइदा हुने बाहेक अरू काम नगर्नेले पार्टी र देशको लागि काम गर्न नसक्ने बताउनुभयो । देशमा विकास र समृद्धि ल्याउन अनुशासित र गतिशील पार्टी बनाउनु पर्नेमा ओलीले जोड दिनुभयो । पार्टी भित्रका समस्यामा छलफल गरेर समाधान गर्नुपर्ने ओलीले बताउनुभयो । विवाद ल्याएर पार्टी अगाडि बढाउन नसकिने तर्फ उहाँले सचेत गराउनुभयो ।

छिटो दौडँदैमा गन्तव्यमा पुग्न नसकिने बताउँदै ओलीले योजनाबद्ध रूपमा अघि बढ्नु पर्ने बताउनुभयो । लयबद्ध र गतिशील पार्टी बनाएर मिसन २०८४ सफल बनाउनु पर्ने उहाँको भनाइ छ । सामाजिक सञ्जालमा जथाभाबी नलेख्न पनि पनि उहाँले निर्देशन दिनुभयो । नकारात्मक कुरा लेख्ने र लाइक गर्न तर सकारात्मक कुरामा लाइक, कमेन्ट केही नगर्ने थिति बढ्दै गएको भन्दै ओलीले आलोचना गर्नुभयो । ओलीले ओलाङचुङ्गोला क्षेत्रमा निर्माण भइरहेको सडक छिटो निर्माण गर्नको लागि आफूले पहल गर्ने पनि प्रतिवद्वता व्यक्त गर्नुभयो । तीन वर्षभित्रै चीनसँग जोडिने सो सडक पूरा गर्ने गरी बजेट विनियोजन गराएर छिटो काम सम्पन्न गराउन आफूले प्रयत्न गर्ने ओलीले जानकारी दिनुभयो ।