सेसेनको अध्यक्षमा जोशी, महासचिवमा डा. पराजुली

हाम्रो इकोनोमि

 

 

सोसाइटी अफ इलेक्ट्रोनिकस एण्ड कम्युनिकेशन ईन्जिनियर्स नेपाल (सेसेन)को सर्वसम्मत रुपमा ११औं नयाँ कार्यकारी समिति चयन गरिएको छ । सेसेनको आज एक विशेष कार्यक्रम आयोजना गरी ई. राजेश जोशीको अध्यक्षतामा ११ सदस्यीय कार्यकारी समिति चयन गरेको हो । समितिको उपाध्यक्षमा ई. मनेसलाल चुके, महासचिवमा डा. ई. शालिग्राम पराजुली सर्वसम्मत निर्वाचित हुनुभएको छ । महासचिव पराजुली बिगतमा देशभरको अप्टिकल ट्रान्समिसन नेटवर्क बिस्तार आयोजना संचालनमा उत्कृस्ट नतिजा निकाल्न सफल व्यक्तित्व हुनुहुन्छ ।

उहाँ हाल नेपाल टेलिकम केन्द्रीय कार्यालय, प्रमुख सञ्चालन अधिकृतको कार्यालय अन्तर्गत नेटवर्क तथा प्रदेश समन्वय विभाग प्रमुखको रुपमा कार्यरत प्रबन्धक हुनुहुन्छ । प्रभावशाली युवा नेतृत्व, आम सूचना प्रविधिकर्मी र युवाहरु माझ अत्यन्त लोकप्रीय, पेशागत दक्षता, कुशल ब्यवस्थापक, अत्याधुनिक प्रविधि क्लाउड कम्प्युटिंग मार्फत सुशासन कायम गर्ने सम्बन्धि विषयमा विद्यावारिधी गर्नु भएका कुशल इञ्जिनिएरका रुपमा उहाँ परिचित हुनुहुन्छ । समाजका अध्यक्ष TTRC का निर्देशक ई जोशीसहितको जुझारु टिमको यस कार्यकालमा समाजले गुणस्तरीय कार्यक्रम र संगठन बिस्तार लगायतका कामहरुमा फड्को मार्ने विश्वास गरिएको छ ।

त्यस्तै उपमहासचिवमा डा. ई. सुरेन्द्र श्रेष्ठ तथा कोषाध्यक्षमा ई. कृष्णप्रसाद भण्डारी चयन हुनुभएको छ । सदस्यहरुमा ई. विनममान श्रेष्ठ, ई. सुमन रञ्जितकार, ई. सञ्जिाव सिंह कठायत, ई. सुरेन्द्रमान श्रेष्ठ, ई. सरोजमान सिंह प्रधान र ई. उदयकृष्ण श्रेष्ठ चयन हुनुभएको छ । समाजको स्थापना सन् १९९६ मा इलेक्ट्रोनिक्स, कम्युनिकेशन र कम्प्युटर इन्जिनियरिङको क्षेत्रमा संलग्न नेपाली इन्जिनियरहरूको पेशागत व्यावसायिक गतिविधिहरु गर्ने उद्देश्यका साथ भएको हो । सेसेनले नेपाली इन्जिनियरहरूले अन्य इलेक्ट्रोनिक्स व्यवसायीहरूसँग सम्बन्ध बढाउन र प्राविधिक ज्ञान विचारहरू साझा गर्ने कार्य गर्दछ । समाजले वर्तमान र नविनतम् प्रविधिहरूमा नियमित प्राविधिक सेमिनार, गोष्ठी, अन्तरक्रिया, सम्मेलन तथा अन्तरक्रिया कार्यक्रमहरूको व्यवस्था गर्दै आएको छ ।

समाजमा विभिन्न दूरसञ्चार अपरेटरहरू, निजी व्यापार संघसंस्था, इन्टरनेट सेवा प्रदायक संस्था, कलेज र विश्वविद्यालयबाट सदस्यहरू रहनुभएको छ । पेशामा उच्च नैतिकता स्थापित गर्न र आफ्ना सदस्यहरूको व्यावसायिक अधिकार सुनिश्चित गर्नमा आफ्नो ध्यान केन्द्रित गर्दै आएको छ । विभिन्न गैरसरकारी संस्थाहरूको नेतृत्वमा समाजले विभिन्न नयाँ प्रविधिको विकास र विस्तारका प्रविधियुक्त तथा दैनिक जीवनमा लागु हुने तथा सम्भावनाका असंख्य कार्यक्रमहरूको माध्यमबाट सदस्य समुदायलाई विभिन्न विषयमा प्रशिक्षण तथा तलिम प्रदान गरी प्रविधिमैत्री मुलुक निर्माण गर्न अग्रणी भूमिका खेल्दै आएको छ ।