स्थानीय तहका उम्मेदवार बन्न यस्तो छ एमालेको मापदण्ड
नेकपा एमालेले स्थानीय तहको निर्वाचनको तयारी थाल्दै उम्मेदवार सिफारिस र निर्णय गर्ने मापदण्ड तोकेको छ । एमाले केन्द्रीय प्रचार तथा प्रकाशन बिभाग प्रमुख पृथ्वीसुब्बा गुरुङका अनुसार बैठकले उम्मदेवार सिफारिसको मापदण्ड पारित गरेको हो ।
उहाँका अनुसार वडाध्यक्ष र सदस्यहरुको सिफारिस वडा कमिटीबाट गर्ने र जिल्ला कमिटीले टिकटको निर्णय गर्ने विधि तय गरिएको छ । यसैगरी विगतमा जस्तै गाउँपालिका अध्यक्ष र उपाध्यक्ष तथा नगरपालिकाका मेयर र उपमेयरको सिफारिस जिल्ला कमिटीले गर्ने र प्रदेश कमिटीले निर्णय लिने मापदण्ड बनाइएको छ ।
त्यस्तै महानगरपालिका र उपमहानगरपालिकाका मेयर तथा उपमेयरको टिकट केन्द्रबाट दिइने र त्यसको सिफारिस जिल्ला र प्रदेश कमिटीले गर्ने मापदण्ड बनाइएको प्रचार विभाग प्रमुख गुरुङले जानकारी दिनुभयो । सचिवालयको बैठकमा स्थानीय चुनावकै बारेमा केन्द्रित रहेर छलफल भएको र अब केन्द्रीय कमिटी बैठकले राजनीतिक प्रतिवेदनसहित दिशा निर्देशन गर्ने उहाँले बताउनु भयो ।
चुनावी रणनीति बनाउन एमाले चैत ७ गते पोलिटव्यूरो र चैत ९ र १० गते केन्द्रीय कमिटी बैठक बोलाएको छ । त्यस्तै चैत १३ गते स्थायी कमिटी बैठक बस्ने गुरुङले जानकारी दिनुभयो ।
