विमानस्थलको पार्किङ क्षेत्रबाट अवैध सुनका बालासहित दुईजना पक्राउ
त्रिभुवन अन्तर्राष्ट्रिय विमानस्थलको पार्किङ क्षेत्रबाट प्रहरीले अवैध सुनका गहनासहित दुईजनालाई पक्राउ गरेको छ।
पक्राउ पर्नेमा नवलपरासीका ३० वर्षीय डोलराज न्यौपाने र एकजनाको नाम खुल्न बाँकी रहेको महानगरीय प्रहरी टेकुले जनाएको छ।
बुधबार साँझ उनीहरूको साथबाट प्रहरीले करिब २ सय ९२ ग्राम सुनको ६ वटा अवैध बालासहित पक्राउ गरेको हो। उनीहरूले विदेशबाट आएका यात्रुहरूसँग सुनका बालाहरू खरिद गरेको प्रहरीको भनाइ छ।
यसबारेमा थप अनुसन्धान भइरहेको विमानस्थल सुरक्षा गार्डका प्रहरी उपरीक्षक दिनेश मैनालीले जानकारी दिए।
