प्रधानमन्त्री ओलीले भने निर्मला पन्तको हत्यारा जसरी पनि पक्राऊ गर्छौ
प्रधानमन्त्री केपी शर्मा ओलीले कञ्चनपुर घटनाका दोषी ढिलो चाँडो कानूनी दायरामा आउने बताउनु भएको छ ।
कञ्चनपुर घटनाको छानबिन गरिरहेको टोलीका सदस्यले नै राजिनामा दिनुलाई गम्भिर षडयन्त्र भएको हुनसक्ने भन्दै प्रधानमन्त्री ओलीले त्यसको पनि छानबिन हुने बताउनुभएको छ ।
आज प्रधानमन्त्री पत्नी राधिका शाक्यले वालुवाटारमा आयोजना गर्नुभएको तीज कार्यक्रममा बोल्दै प्रधानमन्त्री ओलीले महिला हिंसाका घटनामा अपराधी नउम्किउन भनेर सरकार सजग रहेको बताउनुभयो ।
सरकार यस्ता घटनाका दोषीलाई कारवाहीका लागि कडा कानून ल्याउन लागिरहेको पनि उहाँले बताउनुभयो ।
पछिल्लो समयमा तीजका नाउँमा केही तडकभडक पनि देखिन लागेको भन्दै प्रधानमन्त्री ओलीले पुस्तांैदेखि चलिआएको संस्कृतिलाई निरन्तरता दिनुपर्ने तर अनावश्यक खर्च र तडक भडक गर्न नहुने बताउनुभयो ।
‘हामी सबै मिलेर हाम्रो परम्परा र संस्कृतिलाई जोगाउनु पर्छ तर पर्वका नाउँमा विकृति भित्र्याउनु हुन्न’ उहाँले भन्नुभयो ।
पूर्वजले विरासत धानिरहेको सामाजिक मुल्य मान्यता जोगाउन आवश्यक रहेको बताउँदै प्रधानमन्त्री ओलीले वालबच्चालाई कुलतमा फस्न नदिन अभिभावकहरु सचेत हुनुपर्ने बताउनुभयो ।
समाजिक सञ्जालमा पनि कतिपय विकृति देखिन लागेको भन्दै सबै अभिभावकहरु होसियार र चनाखो हुन प्रधानमन्त्री ओलीले आग्रह गर्नुभयो ।