ओली र प्रचण्डले थाले माधव नेपालसँग छलफल, फेरी सचिवालय बैठक सार्ने तयारी
तल्ला कमिटी र जनवर्गीय संगठनहरु एकता गर्न बनेका कार्यदलहरुले अन्यायपूर्ण सिफारिस गरेपछि रुष्ट बनेका वरिष्ठ नेता माधवकुमार नेपालसँग नेकपाका दुई अध्यक्ष केपी शर्मा ओली र पुष्पकमल दाहाल प्रचण्डले छलफल सुरु गरेका छन् ।
प्रदेश, जिल्ला कमिटी र जनवर्गीय संगठनहरुलाई एकता गरी बन्ने नयाँ कमिटीको नेतृत्व हत्याउन सवै प्रकारका गुटहरु सक्रिय बनेका छन् । विधि र प्रक्रियाभन्दा बाहिर गएर नेतृत्व सिफारिस हुन थालेपछि प्रदेश, जिल्ला र जनवर्गीय संगठनहरुमा विवाद चुलिएको छ । विवाद चुलिदै गएपछि नेकपाको सचिवालय र स्थायी कमिटीको बैठक प्रभावित हुँदै आएको छ ।
एकता कार्यदलहरुले प्रधानमन्त्री तथा पार्टी अध्यक्ष केपी शर्मा ओलीको नाममा गुट आतंक नै मच्चाएका छन् । उनीहरुको शैलीप्रति अर्का अध्यक्ष पुष्पकमल दाहाल प्रचण्ड र वरिष्ठ नेता माधव नेपाल, झलनाथ खनाल र बामदेव गौतम असन्तुष्ट छन् । उनीहरु सवैको असन्तुष्टीलाई सम्वोधन गर्न दुई अध्यक्षले छलफल थालेको धुम्वारी स्रोतले बताएको छ ।
अध्यक्ष दाहाल, वरिष्ठ नेता नेपाल, खनाल र गौतम विधि बनाएर तल्ला कमिटीहरु निर्माण गर्नु पर्ने पक्षमा छन् भने अध्यक्ष केपी ओलीले यस बिषयमा औपचारिक कुनै प्रतिक्रिया दिएका छैनन् । विधि बनाउने कि सिफारिसका आधारमा नेतृत्व निर्माण गर्ने ? भन्ने बिषयमा तीन नेताबीच छलफल चलेको छ ।
सोमवार प्रधानमन्त्री ओली र नेता नेपालबीच छलफल भएको थियो भने अपरान्न दाहाल र नेपालबीच टेलिफोन सम्वाद भएको थियो । ‘तीन नेताबीच एकै पटक बसेर कुनै छलफल भएको छैन, तर एक्ला एक्लै नेताहरुबीच छलफल चलिरहेको छ’ नेपालका स्वकीय सचिव मोहन गौतमले भने ।
तीन नेताबीच छलफल सुरु भएपछि बुधवारलाई डाकिएको सचिवालय बैठक पनि स्थगित हुने भएको छ । तीन नेताबीच सहमति जुटेपछि मात्र सचिवालय डाक्ने पक्षमा नेताहरु पुगेका छन् । तर सोमबार दुई अध्यक्षले बुधवार सचिवालय बैठक बोलाउने तयारी गरेका थिए ।
सचिवालय सदस्य नारायणकाजी श्रेष्ठ पनि देश वाहिर जाँदैछन् । उनले आफु नआएसम्म सचिवालयको बैठक नवोलाउन दुवै अध्यक्षलाई आग्रह गरेको स्रोतले बताएको छ ।