नेपाल एयरलाइन्सको जहाज दुवई उड्नु पर्ने मलेशिया पुगेपछि…..
नेपाल एयरलाइन्स व्यवस्थापनप्रति असन्तुष्टि जनाउँदै दर्जनौं कर्मचारीले राजनीनामा दिइरहेकै बेला एयरलाइन्सले अर्को हाँसो उठाउने कार्य बाहिरिएको छ ।
यो हाँसउठ्दो कुरा हो एकातिर पुग्नुपर्ने जहाज अर्कोतिर पुग्नु । एयरलाइन्सको विमान आइतबार राति संयुक्त अरब इमिएट्स (युएई) उड्नुपर्ने सेड्युल थियो । तर, एकाएक निगम व्यवस्थापनले सो उडान रद्द गरेर सोमबार बिहान मलेशियाको राजधानी क्वालालम्पुरका लागि उडाए ।
निगमका एक उच्च अधिकारीका अनुसार एक आईएनजीओको मलेशियामा हुन लागेको कार्यक्रमका लागि दुबई उड्न लागेको विमानको तालिका रद्द गरेर मलेसियातर्फ उडाइएको हो । उनका अनुसार सो कार्यक्रममा भाग लिन निगमकै कर्पोरेट विभागका निर्देशक रवीन्द्र श्रेष्ठ र कमर्सिलय विभागका निर्देशक गोपाल जोशी समेत मलेशिया पुगेका छन् । उनीहरु बाहेक सो टोलीमा अरु ३५ जना पनि रहेको बताइएको छ ।
१५८ सिट क्षमताको न्यारो बडी एयर बस विमानमा आयोजक टोलीबाहेक अन्य ६५ जना गरी कूल १०२ जना टिकट काटेका थिए । सोमबार बिहान काठमाडौंबाट साढे ९ बजे मलेशियाको लागि उडेको सो विमान पी ओल्ट्रा र सुदीप रिजालले उडाएको जनाइएको छ ।
उडान रद्द हुँदा यात्रु मर्कामा
पूर्व निर्धारित तालिकाअनुसार विमान दुबई नउडेर मलेशियाका लागि उडेपछि नेपाल र मलेशियातर्फका २२० जनाको हाराहारीमा रहेका यात्रुहरु समस्यामा परेका छन् । आइतबार राति दुबईको उडान रद्द भएपछि ६३ यात्रुलाई सिनामंगलको होटलमा राखिएको समाचार स्रोतले जानकारी दिएको छ ।
उता दुबईतर्फ पनि यही विमानको टिकट काटेका १५० भन्दा बढी यात्रुलाई स्थानीय होटलमा राखिएको जनाइएको छ । यसरी विमान तालिका अनुसार नउड्दा यात्रुको होटल शुल्क, अपरेशन चार्जलगायत गरी निगमलाई करोडौंको नोक्सान हुन पुगेको छ ।
निगम नेतृत्वकै संलग्नतामा उडान रद्द भएको भन्दै निगमका एक अधिकारीले यस विषयमा व्यवस्थापनभित्र नै मतभेद रहेको स्वीकारे । निगमलाई सुधार गरेर अघि बढ्नुपर्ने पक्षका केही सञ्चालक समितका सदस्यले पहिला दुबईको उडान भरेर फर्किएपछि मलेशियाको लागि उडान गर्दा ठीक हुने धारणा राखेका पनि थिए ।
