बामदेवलाई सांसद बनाउन नवराजको पद धरापमा
सत्तारुढ दल नेपाल कम्युनिस्ट पार्टी (नेकपा)का प्रभावशाली नेता वामदेव गौतमलाई सांसद बन्ने योजना तत्कालका लागि तुहिएको छ ।
डोल्पा जिल्लाबाट उपनिर्वाचनमार्फत सांसद बन्ने सपना देखेका गौतमलाई ठूलो चिन्ता परेको छ ।
डोल्पाबाट निर्वाचित पूर्वएमालेका सांसद धनबहादुर बुढाले राजीनामा नदिने निर्णय गरेपछि गौतमलाई झट्का लागेको हो । बुढाले सांसद पदबाट राजीनामा दिएपछि उपनिर्वाचनमार्फत संसदमा आउने गौतमको योजना थियो ।
पर्यटन तथा नागरिक उड्डयन राज्यमन्त्री समेत रहेका सांसद बुढाले गौतमका लागि आफू बलि नचढ्ने बताउन थालेका छन् ।
गौतमका छोराका साथी र विज्नेश पाटर्नर समेत रहेका बुढाले एक महिना अगाडि सांसद पदबाट राजीनामा दिएर बाटो खुला गर्ने बताएका थिए । बुढालाई पदबाट राजीनामा नदिन कार्यकर्ताहरूले दवाव दिएका छन् ।
गौतमलाई राष्ट्रिय सभाको सांसद बन्न सजिलो छ । तर, राष्ट्रिय सभाको सांसद प्रधानमन्त्री बन्न पाउँदैन । गौतमले प्रतिनिधि सभामा आएर एक पटक प्रधानमन्त्री बन्ने इच्छा राखेका छन् । उनको यो इच्छा तत्काल पूरा हुने छाँटकाँट देखिएको छैन ।
नेकपाले राजीनामा दिन दवाव दियो भने फागुन–चैततिर मात्रै उपयुक्त वातावरण बन्ने उनको भनाइ छ । गौतमले डोल्पाबाट जितेर सांसद बनेमा बुढालाई दुई वर्षपछि राष्ट्रिय सभाको सांसद बनाएर मन्त्री बनाउने आश्वासन गौतमले दिएका छन् ।
गौतमका लागि उपनिर्वाचन गराउने अर्को क्षेत्रको खोजी हुन थालेको छ । पूर्वी रुकुम र प्युठान विकल्प हुन सक्ने भन्दै छलफल चलेको छ ।
पूर्वी रुकुममा पूर्वमाओवादीबाट निर्वाचित सांसद कमला रोक्का र प्यूठानमा जनमोर्चा नेपालबाट विजयी दुर्गा पौडेल सांसद छिन् ।
गौतमले ललितपुर क्षेत्र नं. १ बाट निर्वाचित नवराज सिलवाल, नवलपुरका तिलक महतलाई राजीनामा गराउने योजना पनि बनाएका छन् ।
गौतमले सबैभन्दा उपयुक्त क्षेत्र ललितपुर क्षेत्र नं. हुने बताउने गरेका छन् । गौतमको बसोबास पनि ललितपुरमै रहेकाले सिलवाललाई राजीनामा गर्न लगाएर उपनिर्वाचनमार्फत सांसद बन्ने योजनामा रहेको एक नेताले बताए ।
