५५ लाख नगदसहित ८ जना हुण्डी कारोबारी पक्राउ
वीरगञ्जबाट प्रहरीले हुण्डी कारोबारमा संलग्न रहेको आशंकामा ८ जनालाई नियन्त्रणमा लिएको छ ।
उनीहरुको साथबाट ५४ लाख ९६ हजार नेपाली रुपैयाँसमेत बरामद भएको छ । वीरगञ्जको गहवामाई मन्दिर, घडिअर्वा पोखरी र गणेशमान चोक आसपासबाट उनीहरुलाई नियन्त्रणमा लिएको जिल्ला प्रहरी कार्यालय पर्साले जनाएको छ ।
घटनाबारेमा अनुसन्धान भइरहेको भन्दै पक्राउ परेकाहरुको नाम प्रहरीले खुलाएको छैन । जिल्ला प्रहरी कार्यालय पर्साका प्रवक्ता प्रहरी नायब उपरीक्षक सत्य नारायण थापाले अनुसन्धान भइरहेकोले पक्राउ परेकाहरुको नाम अहिले नै सार्वजनिक गर्न नमिल्ने बताए ।
‘हुण्डी कारोबारमा संलग्न रहेको आशंकामा हामीले उनीहरुलाई नियन्त्रणमा लिएका छौं, उनीहरुको साथबाट ठूलो परिमाणमा नगद पनि बरामद भएको छ,’ उनले भने, ‘अनुसन्धान पछि थप विवरण सार्वजनिक गर्छौ ।’
