नक्कली सर्टिफिकेटले प्रहरीको इन्सपेक्टरको जागिर, विशेष अदालतमा मुद्दा दायर
प्रहरी प्रधान कार्यालयमा कार्यरत एक जना प्रहरी निरीक्षक (इन्सपेक्टर) ले नक्कली शैक्षिक प्रमाणपत्र पेश गरेर जागिर खाएको रहस्य खुलेको छ ।
प्रहरी प्रधान कार्यालयमा कार्यरत इन्सपेक्टर चूँडामणि केसीले नक्कली शैक्षिक प्रमाणपत्र पेश गरी जागिर खाएको भेटिएपछि अख्तियार दुरुपयोग अनुसन्धान आयोगले बुधवार विशेष अदालतमा मुद्दा दायर गरेको छ ।
प्रहरी सहायक निरीक्षक (असई) पदमा भर्ना भएर प्रहरी निरीक्षकसम्म बढुवा भएका केसीले नक्कली शैक्षिक प्रमाणपत्रका आधारमा जागिर खाएको भन्ने उजुरीका आधारमा छानबिन गर्दा उनले माध्यमिक शिक्षा परिषद क्षेत्रीय कार्यालय वाराणसी भारतबाट प्राप्त गरेको इन्टरमिडियट लेभलको शैक्षिक प्रमाण पत्र नक्कली भएको फेला परेको अख्तियारका प्रवक्ता रामेश्वर दंगालले जानकारी दिएका छन् ।
केसीले नक्कली शैक्षिक प्रमाणपत्र पेश गरी जागिर खाएको तथा बढुवाको सुविधा समेत उपभोग गरेको भन्दै अख्तियारले उनीविरुद्ध भ्रष्टाचार निवारण ऐनअन्तर्गत कार्बाहीका लागि विशेष अदालतमा मुद्दा दायर गरेको हो ।
