गोरखा जेल ब्रेककी कमाण्डर शिलु पक्राउ, विप्लव माओवादीलाई फेरि अर्को धक्का
नेत्रबिक्रम चन्द ९बिप्लब० नेतृत्वको नेपाल कम्युनिष्ट पार्टीकी अर्को शीर्ष नेता आज (मंगलबार) पक्राउ परेकी छन् ।
प्रहरीले आज चर्चित माओवादी नेतृ उमा भुजेल (शिलु) लाई काठमाडौंबाट पक्राउ गरेको प्रहरीले पारिवारिक स्रोतले जानकारी दिएको छ । तर, यस विषयलाई प्रहरीले गोप्य नै राखेको छ ।
१० बर्षे सशस्त्र माओवादी जनयुद्धकी चर्चित नेतृ भुजेलको नेतृत्वमा ५ जना माओवादी कार्यकर्ताहरुले गोरखा जेल ब्रेक गरेका थिए ।
पहिलो संविधानसभा सदस्य र त्यसअघिको अन्तरिम संसदमा सदस्य रहेकी भुजेल अहिले बिप्लब नेतृत्वको नेकपाकी शीर्ष नेतामा हुन् । गोरखा जेल ब्रेक गरेर निस्केकी नेतृ भुजेल त्यसपछि माओवादीको सैन्य फाँटमा सक्रिय रहिन् र जनसेनाको ब्रिगेड कमाण्डर र कमिसार समेत हुन सफल भएकी थिइन् ।
माओवादी विभाजित भए पनि शुरुमा मोहन बैद्य नेतृत्वको माओवादीमा रहेकी उनी त्यो पार्टी पनि विभाजित भएपछि चन्द नेतृत्वको माओवादीमा सक्रिय छिन् ।
पछिल्लो समय माओवादीका शीर्ष नेताहरु धमाधम पक्राउ पर्न थालेका छन् । विप्लव माओवादीले सैन्य अभ्यास र हतियारको बन्दोवस्ती थालेको समाचार सार्वजनिक हुन थालेपछि सरकार विप्लव माओवादीप्रति आक्रमक बनेको हो ।
केहि समयअघि मात्र नेकपाका प्रवक्ता खड्गबहादुर विश्वकर्मा ‘प्रकाण्ड’ सहितका नेताहरु पक्राउ परेका छन् । सरकारले विप्लव माओवादीलाई वार्ताका लागि आह्वान गरे पनि विप्लव माओवादीले भने वार्ताको औचित्य नभएको प्रतिक्रिया दिएको छ ।