बिम्स्टेक सम्मेलन, रिट्रिटको स्थान टुंगिएन, हिमश्रृंखला र साइटसिन देखिने स्थानको खोजी

 

चौथो बिम्स्टेक सम्मेलन आउन केही दिनमात्र बाँकी छ । सरकार यतिबेला बिमस्टेकका पाहुनालाई गर्ने स्वागत, भेटघाट र सम्मेलन स्थलको सुरक्षामा केन्द्रित देखिएको छ । सम्पूर्ण तयारी लभभग पूरा भएको जनाएको परराष्ट्र मन्त्रालयले भ्रमण तालिका समेत सार्वजनिक गरेर ६ देशका विशिष्ट पाहुनाको नेपाल भ्रमणभरको सुरक्षा व्यवस्था कडा पारिएको समेत जनाएको छ ।

 

सम्मेलनमा ६ वटा देशका कार्यकारी प्रमुख नेपाल भ्रमणमा आउने निश्चितप्राय छ । सम्मेलनमा सहभागी हुने सदस्यको स्वागतका लागि त्रिभूवन अन्तर्राष्ट्रिय विमानस्थलदेखि होटल सोल्टी र होटल हायातसम्मको सुरक्षा व्यवस्था कडा पारिएको छ । भदौ १२ गतेदेखि नै राष्ट्र प्रमुखहरुको उपस्थिति हुने जनाउँदै परराष्ट्रले तीन दिनको कार्यतालिका समेत तयार पारेको छ ।

 

सदस्य ६ देशका राष्ट्र प्रमुखको स्वागतमा भदौ १४ गते राष्ट्रपति विद्यादेवी भण्डारीले दिवा भोजको आयोजना गर्ने कार्यतालिका छ । शीतल निवासमा आयोजना हुने दिवा भोजलगत्तै सामूहिक रुपमा राष्ट्रपतिसँग ६ देशका राष्ट्र प्रमुखले भेटवार्ता गर्ने कार्यक्रम तय भएको छ । त्यसलगत्तै, होटल सोल्टीमा बिम्स्टेक सम्मेलनको उद्घाटन हुनेछ । भदौ १४ गते नै प्रधानमन्त्री केपी शर्मा ओलीद्वारा होटल हायातमा सरकार प्रमुखका लागि गाला डिनरको आयोजना हुनेछ ।

 

भदौ १५ गतेको कार्यतालिका 
बिम्स्टेक सम्मेलनको दोश्रो दिन नेपाल सरकारले ६ राष्ट्रका प्रमुखलाई रिट्रिट दिइनेछ । रिट्रिटको स्थान टुंगो नलागेपनि नेपालको हिमश्रृङखला देखिने स्थान प्रमुख गन्तव्य बनाइनेछ । रिट्रिट लगत्तै बिमस्टेक सम्मेलनको दोश्रो दिनको कार्यक्रम पुनः सुरु हुनेछ । जहाँ नेपालले दुई मुख्य विषयमा सम्झौता गर्नेछ । सम्झौता लगत्तै श्रीलंकालाई सम्मेलनको अध्यक्षता प्रदान गरिनेछ ।

 

भदौ १६ गतेको कार्यतालिका
परराष्ट्र मन्त्रालयका अनुसार भदौ १६ गते श्रीलंका र म्यानमारका राष्ट्रपतिले गौतम बुद्धको जन्मस्थल लुम्बिनीको भ्रमण गर्ने कार्यतालिका छ । दुई राष्ट्रका प्रमुखको नेपाल भ्रमण पूर्व नै तय भएको कार्यतालिका अनुसार १६ गते बिहान उनीहरु लुम्बिनी प्रस्थान गर्नेछन् ।

 

त्यसैगरी, भारतीय प्रधानमन्त्री नरेन्द्र मोदीले पशुपतिनाथ मन्दिरको दर्शन गर्ने मन्त्रालयले जनाएको छ । पशुपतिनाथको दर्शनलगत्तै गोशालास्थित भारत सरकारको सहयोगमा निर्माण गरिएको गौशाला धर्मशालाको उद्घाटन गर्नेछन् ।

 

६ राष्ट्रका प्रमुखको उपस्थितिका क्रममा काठमाडौं उपत्यकामा हजारौंको संख्यामा सुरक्षाकर्मी परिचालन गरिएको छ भने सवारी साधनमा जोर बिजोर प्रणाली लागु गरिने भएको छ ।