कञ्चनपुर घटनाको छानविन गर्न गठित टोली घटनास्थलमा, वार्ता गर्ने पनि तयारी
कञ्चनपुरका प्रमुख जिल्ला अधिकारी, प्रहरीको नेतृत्व फेरिएसगै कफ्र्यु हटेपछि सो क्षेत्रको अवस्था आज भने शान्तिपूर्ण बनेको छ । सरकारले बनाएको उच्चस्तरिय छानविन समिति पनि महेन्द्रनगर पुगेपछि स्थानीयले न्याय पाउने आशा व्यक्त गरेका छन् ।
हिजो अश्रुग्यास र गोली प्रहारका घटना भएपछि साँझ ५ बजेदेखी लगाइएको कफ्र्यु आज विहान हटेपछि अवस्था शान्तिपूर्ण बनेको हो । स्थानीय प्रशासनले आन्दोलनरत पक्षसग वार्ता गर्ने तयारी गरेको छ । पिडितको परिवार, स्थानीयबासिन्दासग वार्ता गरी कसरी अगाडी बढ्ने भन्ने बारेमा वार्ताको तयारी गरेको हो ।
यसैविच, १३ वर्षीय बालिकाको बलात्कारपछि हत्या गरिएको पृष्ठभूमिको घटना अनुसन्धानका लागि सरकारले गठन गरेको उच्च स्तरीय छानबिन समितिको टोली शुक्रबार बिहान महेन्द्रनगर पुगेको छ ।
सहसचिव हरिप्रसाद मैनालीको संयोजकत्वमा बिहिबार गठन गरिएको पाँच सदस्यीय छानबिन समिति शुक्रबार बिहान काठमाण्डौँबाट बुद्ध एयरमार्फत धनगढी हुदै महेन्द्रनगर पुगेको हो । सत्यतथ्य छानबिन गरी प्रतिवेदन तयार गर्न १५ दिनको म्याद दिइएको समितिले आजैदेखि छानबिन थाल्ने संयोजक मैनालीले बताए । उक्त समितिमा तीन वटै सुरक्षा निकायका एआइजीहरु, प्रदेश ७ को आन्तरिक मामिला तथा कानुन मन्त्रालयका प्रतिनिधि रहेका छन् ।
